६ दलिय निर्वाचन बहिष्कारमा सशक्त सहभागिता जनाउने क्रान्तिकारी युवा सङ्घ नेपालको घोषणा

ईमधेश न्यूज सम्वाददाता,
काठमाडौँ, २७ पौष ।
 क्रान्तिकारी कम्युनिस्ट पार्टीसहित ६ दलले आह्वान गरेको संयुक्त निर्वाचन बहिष्कार कार्यक्रममा क्रान्तिकारी युवा सङ्घ नेपालले सशक्त सहभागिता जनाउने घोषणा गरेको छ । आइतबार राजधानीको संवाद डबलीमा आयोजित पत्रकार सम्मेलनमार्फत सङ्घले सरकारलाई पेस गरिएको ४३ बुँदे मागपत्र सार्वजनिक गर्दै आगामी निर्वाचन बहिष्कार गर्ने स्पष्ट धारणा राखेको हो ।
सङ्घका संयोजक सूर्य तिमल्सिनाले जेनजी विद्रोहबाट प्राप्त जनआन्दोलनको म्यान्डेटलाई बेवास्ता गर्दै गरिने निर्वाचन अस्वीकार्य भएको बताए । उनले पुस २५ गते युवा तथा खेलकुद मन्त्री बाबुल गुप्तामार्फत राष्ट्रियता, जनतन्त्र र जनजीविकासँग सम्बन्धित ४३ बुँदे मागपत्र सरकारसमक्ष पेस गरिएको जानकारी दिए । “सरकारले माग सम्बोधन नगरे निकट भविष्यमा कडा संघर्षमा उत्रन बाध्य हुनेछौं,” तिमल्सिनाले चेतावनी दिए ।
पत्रकार सम्मेलनमा १३ दिन हिरासतपछि रिहा भएका सङ्घका सचिवालय सदस्य शंकर शाहीले आफूलाई विनाकारण पक्राउ गरिएको आरोप लगाए । उनले प्रहरी प्रशासन र म्यानपावर व्यवसायीबीच मिलेमतो भएको आशंका व्यक्त गर्दै मानव तस्कर र देशद्रोहीको उक्साहटमा आफूलाई दुःख दिइएको दाबी गरे । साथै, सर्वोच्च अदालतबाट न्याय पाएकोमा कानुन व्यवसायी र अदालतप्रति आभार व्यक्त गरे ।
सङ्घका सहसंयोजक दोर्ची शेर्पाले ४३ बुँदे मागपत्र वाचन गरेका थिए । कार्यक्रममा क्रान्तिकारी खेलकुद महासंघका केन्द्रीय संयोजक सूर्य भूजेल र क्रान्तिकारी उद्योग तथा वाणिज्य संघका केन्द्रीय संयोजक शिव धिमाललगायतको उपस्थिति रहेको थियो ।