राष्ट्रिय एकता दिवसले विविधताबीचको एकता सुदृढ बनाउने प्रेरणा दिन्छ: उपराष्ट्रपति यादव

लिलाकान्त यादव,
काठमाडौँ, २७ पौष ।
 उपराष्ट्रपति रामसहाय प्रसाद यादवले राष्ट्रिय एकता दिवसले नेपालका विविधताबीचको एकतालाई थप सबल बनाउने प्रेरणा दिने बताएका छन् । राष्ट्रिय एकता दिवस, २०८२ को अवसरमा शुभकामना सन्देश जारी गर्दै उनले स्वदेश तथा विदेशमा रहेका सम्पूर्ण नेपालीलाई शान्ति, समृद्धि, सुस्वास्थ्य र प्रगतिका लागि शुभेच्छा व्यक्त गरेका हुन् ।
उपराष्ट्रपति यादवले पुस २७ गते मनाइने राष्ट्रिय एकता दिवस (पृथ्वी जयन्ती) ले मुलुकलाई एक सूत्रमा बाँध्न महान् योगदान गर्ने पुर्खाहरूको सम्मान गर्ने अवसर प्रदान गर्ने उल्लेख गरे । नेपालको बहुजातीय, बहुभाषिक, बहुधार्मिक र बहुसांस्कृतिक विशेषतालाई आत्मसात गर्दै सामाजिक सद्भाव, सहिष्णुता र समरसता अभिवृद्धि गर्न यो दिवस महत्वपूर्ण रहेको उनले बताए ।
उनले व्यक्तिगत हितभन्दा माथि उठेर राष्ट्रहितलाई प्राथमिकता दिनु नै समावेशी र सशक्त नेपाल निर्माणको आधार भएको उल्लेख गर्दै युवापुस्तामा मातृभूमिप्रति समर्पण, सेवा र जिम्मेवारीको भावना विकास गर्न राष्ट्रिय एकता दिवसले प्रेरणा दिने विश्वास व्यक्त गरे । साथै, विभेद, वैमनस्यता र असहिष्णुतालाई त्यागी समान अवसर, सामाजिक न्याय र सांस्कृतिक सम्मानलाई जीवनको मूल मन्त्र बनाउन उनले सबैलाई आह्वान गरे ।
उपराष्ट्रपति यादवले राष्ट्रिय एकता दिवसले संघीय लोकतान्त्रिक गणतन्त्रात्मक व्यवस्थामार्फत दिगो शान्ति, सुशासन, विकास र समृद्धिको आकांक्षा पूरा गर्न मार्ग प्रशस्त गर्ने विश्वास व्यक्त गरेका छन् ।