धनुषामा ऐलानी जग्गा विवाद उग्र, सतलोक आश्रम–स्थानीय झडपमा एक दर्जन घाइते

ईमधेश न्यूज सम्वाददाता,
जनकपुर, २६ पौष ।
 धनुषाको मिथिला नगरपालिका–२ नक्टाझिजको सुग्जोरमा रहेको सतलोक आश्रम (रामपाल आश्रम) वरपरको ऐलानी जग्गा कब्जा गरेको विषयलाई लिएर शनिबार स्थानीयवासी र आश्रमका अनुयायीबीच झडप भएको छ । झडपमा दुवै पक्षका गरी एक दर्जनभन्दा बढी व्यक्ति घाइते भएका छन् भने स्थिति नियन्त्रणमा लिन प्रहरीले अश्रुग्यास प्रहार गर्नुपरेको छ ।
स्थानीयका अनुसार आश्रमले सरकारी ऐलानी जग्गा अतिक्रमण गरी संरचना निर्माण गरेको आरोप लगाउँदै शनिबार नापजाँच र जग्गा खाली गराउने तयारी गरिएको थियो । सोही क्रममा आश्रमभित्र रहेका अनुयायी र स्थानीयबीच भनाभन सुरु भई झडपमा परिणत भएको हो । आश्रमका अनुयायीहरूले स्थानीयमाथि लखेट्दै कुटपिट गरेपछि अवस्था झनै तनावग्रस्त बनेको प्रहरीको भनाइ छ ।
झडपपछि आक्रोशित स्थानीयहरूले जनकपुर–ढल्केवर सडक खण्डअन्तर्गत महेन्द्रनगर–औरही पुल क्षेत्रमा टायर बालेर सडक अवरुद्ध गरेका छन् । प्रदर्शनका क्रममा आश्रमबाट बाहिरिएको एक एम्बुलेन्समाथि तोडफोडसमेत भएको जनाइएको छ । स्थिति नियन्त्रणबाहिर जान थालेपछि धनुषा प्रहरीले ६ सेल अश्रुग्यास प्रहार गरेको छ ।
घाइतेहरूलाई उपचारका लागि जानकी मेडिकल कलेज र प्रादेशिक अस्पताल, जनकपुर लगिएको छ । अस्पताल स्रोतका अनुसार अधिकांश घाइतेको अवस्था सामान्य भए पनि केहीको टाउको र शरीरका विभिन्न भागमा चोट लागेको छ ।
स्थानीयवासीहरूले ऐलानी जग्गा अतिक्रमणबारे प्रशासनले समयमै कदम नचालेको आरोप लगाउँदै दोषीमाथि कडा कारबाही र अतिक्रमण हटाउन माग गरेका छन् । आश्रम पक्षले भने आफूहरूमाथि एकतर्फी आक्रमण भएको दाबी गरेको छ । क्षेत्रको सुरक्षा अवस्थालाई मध्यनजर गर्दै प्रहरीको बाक्लो उपस्थिति राखिएको छ ।