सप्तरीमा तीन दलबीच समन्वय बैठक, सात सदस्यीय कार्यदल गठन

लिलाकान्त यादव,
राजविराज, २६ पौष ।
 राष्ट्रिय मुक्ति पार्टी नेपालको सप्तरी जिल्ला कार्यालय राजविराजमा नागरिक उन्मुक्ति पार्टी र जनता समाजवादी पार्टी (जसपा) का जिल्ला स्तरीय प्रमुख नेताहरूबीच संयुक्त बैठक सम्पन्न भएको छ । बैठकमा आगामी निर्वाचनमा प्रभावकारी भूमिका निर्वाह गर्ने विषयमा छलफल गरिएको छ ।
बैठकले निर्वाचन केन्द्रित गतिविधिलाई समन्वयात्मक र सशक्त बनाउने उद्देश्यसहित राष्ट्रिय मुक्ति पार्टी सप्तरीका जिल्ला अध्यक्ष दिपेन्द्र चौधरीको संयोजकत्वमा सात सदस्यीय कार्यदल गठन गरेको छ । कार्यदलले तीनै दलबीच सहकार्य, रणनीति निर्माण तथा स्थानीयस्तरमा संगठन सुदृढीकरणका विषयमा काम गर्ने जनाइएको छ ।
गठित कार्यदलमा जनता समाजवादी पार्टीको तर्फबाट जिल्ला अध्यक्ष सत्यनारायण यादव र सन्तोष कुमार मण्डल सदस्य रहेका छन् । त्यस्तै, नागरिक उन्मुक्ति पार्टीको तर्फबाट जिल्ला अध्यक्ष ब्रिजेन्द्र चौधरी र रमाकान्त चौधरीलाई कार्यदल सदस्यका रूपमा समेटिएको छ । राष्ट्रिय मुक्ति पार्टीको तर्फबाट महिला नेतृ रिसु चौधरी कार्यदल सदस्य रहेकी छन् ।
बैठकमा सहभागी नेताहरूले आगामी निर्वाचनमा साझा एजेन्डा तय गरी जनतासँग प्रत्यक्ष रूपमा जोडिने कार्यक्रम अघि बढाउने प्रतिबद्धता व्यक्त गरेका छन् । साथै, लोकतान्त्रिक मूल्य, सामाजिक न्याय र समावेशी प्रतिनिधित्वलाई प्राथमिकतामा राख्दै संयुक्त रूपमा अगाडि बढ्ने सहमति भएको बताइएको छ ।