“लौरो र स्वतन्त्र एकै ठाउँमा” — नयाँ शक्तिहरू एकजुट हुनुको विकल्प छैन: डा. हरि कार्की

ईमधेश न्यूज सम्वाददाता,
काठमाडौँ, २५ पौष ।
२०७९ को स्थानीय तह निर्वाचनपछि अटेरी अभियान, लौरो अभियान, नागरिक विद्रोह हुँदै न्भलश् २.० सम्म विभिन्न नाम र स्वरूपमा सक्रिय रहँदै आएको स्वतन्त्र राजनीतिक धार अब स्पष्ट एकतामा उभिएको छ । बुढानगरमा आज सम्पन्न देशव्यापी भेलाले “लौरो कता हरायो?” भन्ने प्रश्नको स्पष्ट जवाफ दिँदै लौरो हराएको नभई स्वतन्त्र चेतनालाई एक ठाउँमा ल्याउने प्रक्रियामा रहेको सन्देश दिएको छ ।
भेलामा ८३ जना स्वतन्त्र तथा लौरो उम्मेदवार र ११४ जना विभिन्न स्वतन्त्र अभियानका प्रमुख अभियन्ताहरूको सहभागिता रहेको थियो । करिब दुई सय प्रतिनिधिहरूको उपस्थितिमा सम्पन्न भेलाले लौरो अभियान र स्वतन्त्र राजनीतिक धारलाई एउटै साझा प्लेटफर्ममा अघि बढाउने प्रतिबद्धता व्यक्त गरेको छ ।
भेलामा नयाँ शक्तिहरू आ–आफ्नै दिशामा छुट्टिएर हिँड्दा अपेक्षित उपलब्धि हासिल गर्न नसकिने निष्कर्ष निकाल्दै अब एकता अपरिहार्य भएको ठहर गरिएको छ । आन्दोलनको इतिहास, जरा र धरोहर नबुझी अघि बढ्दा वैकल्पिक राजनीति कमजोर र दिशाहीन हुने चेतावनी पनि सहभागीहरूले दिएका छन् ।
लौरो अभियानका केन्द्रीय प्रवक्ता डा. हरि कार्कीले आजको भेला केवल छलफलमा सीमित नभई राजनीतिक स्पष्टताको महत्वपूर्ण मोड भएको बताए । “२०७९ यता एउटै आन्दोलन विभिन्न नाममा निरन्तर संघर्षरत रह्यो । आज लौरो र स्वतन्त्र एकै ठाउँमा उभिएका छन् । टुक्रिएर होइन, एकजुट भएर मात्रै वैकल्पिक राजनीति सम्भव हुन्छ,” उनले भने ।
राजनीतिक विश्लेषकहरूका अनुसार यो भेलाले काठमाडौं महानगर प्रमुख बालेन शाह, राष्ट्रिय स्वतन्त्र पार्टीसहित समग्र नयाँ राजनीतिक धारलाई गम्भीर सन्देश दिएको छ । स्वतन्त्र राजनीति अब भावनामा होइन, संगठन, संख्या र साझा रणनीतिमा अघि बढ्ने संकेत यस भेलाले दिएको उनीहरूको बुझाइ छ ।