इञ्जिनियर्स एसोसिएसन मधेसका पूर्व अध्यक्ष नन्दकिशोर यादव जसपा नेपाल प्रवेश

ईमधेश न्यूज सम्वाददाता,
काठमाडौँ, २४ पौष ।
नेपाल इन्जिनियर्स एसोसिएसन मधेस प्रदेशका पूर्व अध्यक्ष इञ्जिनियर नन्दकिशोर यादव जनता समाजवादी पार्टी (जसपा) नेपालमा प्रवेश गरेका छन् । बिहीबार जसपा नेपालको केन्द्रीय कार्यालय बालकुमारीमा आयोजित कार्यक्रममा पार्टीका राष्ट्रिय अध्यक्ष उपेन्द्र यादवले इञ्जिनियर यादवलाई खादामाला लगाएर औपचारिक रूपमा पार्टीमा स्वागत गर्नुभयो ।
धनुषा जिल्लाको सबैला नगरपालिका–६ निवासी इञ्जिनियर यादव यसअघि नेपाली कम्युनिस्ट पार्टीको मधेस प्रदेश समिति सदस्य तथा भौतिक पूर्वाधार तथा यातायात विभागको केन्द्रीय सदस्यका रूपमा सक्रिय रहँदै आएका थिए । इञ्जिनियरिङ क्षेत्रसँगै राजनीतिक र संगठनात्मक गतिविधिमा लामो समयदेखि सक्रिय रहनुभएका यादवले पूर्वाधार विकास, नीति निर्माण र प्राविधिक क्षेत्रका सवालमा उल्लेख्य अनुभव हासिल गर्नुभएको छ ।
पार्टी प्रवेश कार्यक्रममा अध्यक्ष उपेन्द्र यादवले इञ्जिनियर नन्दकिशोर यादवको आगमनले मधेस प्रदेशमा जसपा नेपालको संगठन थप मजबुत हुने विश्वास व्यक्त गर्नुभयो । उहाँले राजनीतिक, सामाजिक तथा पूर्वाधार विकासका क्षेत्रमा अनुभवी व्यक्तिहरू पार्टीमा जोडिनु सकारात्मक संकेत भएको उल्लेख गर्दै मधेसका मुद्दा, संघीयता, समावेशिता र विकासका एजेन्डालाई अझ प्रभावकारी ढंगले अघि बढाउन सहयोग पुग्ने बताउनुभयो ।
पार्टी प्रवेश कार्यक्रममा जसपा नेपालका सहअध्यक्ष रकम चेम्जोङ, महासचिवद्वय लालबाबु राउत र रामकुमार शर्मा, कार्यकारिणी समिति सदस्य दीपक कार्की लगायतका नेताहरूको उपस्थिति रहेको थियो । यसै अवसरमा हालै जसपा नेपालमा प्रवेश गरेका रेणुकुमारी यादव र प्रदीप यादव पनि कार्यक्रममा सहभागी थिए ।
पार्टी प्रवेश गर्दै इञ्जिनियर यादवले मधेसको विकास, सामाजिक न्याय र समावेशी लोकतन्त्रका सवालमा जसपा नेपालको नीति र दृष्टिकोणसँग आफू सहमत रहेको जनाउँदै पार्टीको संगठन विस्तार र जनआधार मजबुत बनाउन सक्रिय भूमिका निर्वाह गर्ने प्रतिबद्धता व्यक्त गर्नुभयो ।