सार्वजनिक जग्गा व्यक्तिको नाममा दर्ता गरी करोडौँ कुम्ल्याएको आरोपमा भू–माफियाविरुद्ध उजुरी

ईमधेश न्यूज सम्वाददाता,
काठमाडौँ, २४ पौष ।
 काभ्रेपलाञ्चोक जिल्लाको नमोबुद्ध नगरपालिका–४ का स्थानीयहरूले सार्वजनिक जग्गा व्यक्तिको नाममा दर्ता गरी करोडौँ रुपैयाँ कुम्ल्याइएको आरोप लगाउँदै भू–माफियाविरुद्ध अख्तियार दुरुपयोग अनुसन्धान आयोगलगायत सम्बन्धित निकायमा उजुरी दिएका छन् ।
स्थानीयका अनुसार परापूर्वकालदेखि गौचरणका रूपमा प्रयोग हुँदै आएको तथा २०२१ सालको नापीमा जंगल कायम गरिएको काभ्रेपलाञ्चोक जिल्ला मेथिनकोट गाविस वडा नं. २ (हाल नमोबुद्ध नपा–४) स्थित कित्ता नं. ३०४ को ११–११–२–० क्षेत्रफलको सार्वजनिक जग्गा व्यक्तिको नाममा दर्ता गरी अवैध रूपमा बेचबिखन गरिएको हो ।
उक्त जग्गा ठण्डिराज उपाध्याय र केदारराज उपाध्यायले व्यक्तिगत नाममा दर्ता गराई प्रति आना ७ लाखदेखि १० लाख रुपैयाँसम्ममा बिक्री गरी करोडौँ रुपैयाँ आर्जन गरेको स्थानीयको दाबी छ । उनीहरूका अनुसार सो जग्गा छुट जग्गाको नाममा दर्ता गरी सार्वजनिक सम्पत्तिको दुरुपयोग गरिएको हो ।
उजुरीमा यस प्रकरणमा भू–माफियासँगै काभ्रेपलाञ्चोकका मालपोत कार्यालय प्रमुख, नापी कार्यालय प्रमुख तथा नमोबुद्ध नगरपालिका–४ का वडाध्यक्ष अर्जुनबहादुर कार्कीको समेत प्रत्यक्ष संलग्नता रहेको आरोप लगाइएको छ ।
स्थानीयहरूले अवैध रूपमा कब्जा गरिएको सार्वजनिक जग्गा संरक्षण गरी पुनः सरकारी स्वामित्वमा ल्याउन र यस कार्यमा संलग्न सबैलाई कानुनबमोजिम कडा कारबाही गर्न माग गरेका छन् । उजुरीमाथि सम्बन्धित निकायले छानबिन अघि बढाउने अपेक्षा स्थानीयवासीले गरेका छन् ।