पल्सर खेलकुद पुरस्कार–२०८१ सम्पन्न, पोखरा एभेन्जर्सद्वारा हिमनदी संरक्षण सन्देश

ईमधेश न्यूज सम्वाददाता,
काठमाडौँ, २४ पौष ।
नेपाल खेलकुद पत्रकार मञ्चद्वारा आयोजित पल्सर खेलकुद पुरस्कार–२०८१ विभिन्न विधामा सम्पन्न भएको छ । कार्यक्रममा वर्षभरि उत्कृष्ट प्रदर्शन गरेका खेलाडी, प्रशिक्षक तथा खेलकुद संस्थाहरूलाई सम्मान गरिएको थियो ।
सोही अवसरमा पोखरा एभेन्जर्स क्रिकेट टोलीले खेलकुदसँगै वातावरणीय जिम्मेवारीलाई जोड्दै ‘हिमनदी संरक्षण’ सम्बन्धी सन्देश प्रवाह गरेको छ । पोखरा एभेन्जर्सका अध्यक्ष इञ्जिनियर सुबोध त्रिपाठीले हिमालय क्षेत्रका हिमनदीहरू तीव्र रूपमा पग्लिँदै जानु गम्भीर चिन्ताको विषय बनेको बताउँदै खेलकुदजस्तो लोकप्रिय माध्यमबाट जनचेतना फैलाउने उद्देश्यले यो अभियान अघि बढाइएको जानकारी दिए ।
अध्यक्ष त्रिपाठीका अनुसार हिमनदीहरू नेपालको जलस्रोत, कृषि, पर्यटन र समग्र जीवन प्रणालीसँग प्रत्यक्ष रूपमा जोडिएका छन् । जलवायु परिवर्तनका कारण हिमनदी पग्लिँदा भविष्यमा खानेपानी, ऊर्जा उत्पादन र प्राकृतिक सन्तुलनमा गम्भीर असर पर्न सक्ने भएकाले सबै क्षेत्रको सहकार्य आवश्यक रहेको उनले उल्लेख गरे ।
पोखरा एभेन्जर्सले प्रतियोगिताका क्रममा पहिरन, सार्वजनिक प्रस्तुति तथा विभिन्न कार्यक्रममार्फत हिमनदी संरक्षणको सन्देश प्रवाह गर्दै आएको जनाएको छ । खेलकुद केवल प्रतिस्पर्धा र मनोरञ्जनमा सीमित नभई सामाजिक तथा वातावरणीय उत्तरदायित्व वहन गर्ने सशक्त माध्यम हुन सक्ने अध्यक्ष त्रिपाठीको भनाइ छ ।
खेलकुद पुरस्कार समारोहमा पोखरा एभेन्जर्सको यस पहललाई सहभागीहरूले सकारात्मक रूपमा लिँदै खेल र वातावरणलाई जोड्ने प्रयासले युवा पुस्तामा चेतना अभिवृद्धि गर्ने अपेक्षा व्यक्त गरेका छन् ।