सामाजिक सद्भाव र शान्ति कायम राख्न उपराष्ट्रपति यादवको अपिल

लिलाकान्त यादव,
काठमाडौँ, २२ पौष ।
 उपराष्ट्रपति रामसहाय प्रसाद यादवले पछिल्ला दिनहरूमा मुलुकका केही भूभागमा देखिएका सम्प्रदायगत असमझदारी, वैमनस्यता र द्वन्द्वप्रति गम्भीर चिन्ता व्यक्त गर्दै सामाजिक सद्भाव, शान्ति र सहिष्णुता कायम राख्न सबै नेपालीलाई आग्रह गरेका छन् ।
मंगलबार जारी सार्वजनिक अपिलमार्फत उपराष्ट्रपति यादवले नेपालको संविधानले मुलुकलाई धर्मनिरपेक्ष, समावेशी र विविधतापूर्ण समाजका रूपमा परिभाषित गरेको स्मरण गराउँदै प्रत्येक नागरिकलाई आफ्नो धर्म, संस्कृति र परम्परा पालन गर्ने स्वतन्त्रता सुनिश्चित गरिएको उल्लेख गरेका छन् । उनले नेपालको शक्ति विविधता, सहिष्णुता र परस्पर सम्मानमा निहित रहेको बताए ।
उपराष्ट्रपति यादवले सबै धर्म, सम्प्रदाय र समुदाय एउटै राष्ट्रिय परिवारका सदस्य भएको उल्लेख गर्दै भाइचारा, सहअस्तित्व र परस्पर विश्वासलाई अक्षुण्ण राख्नु साझा कर्तव्य भएको बताए । उनले धार्मिक वा सांस्कृतिक भिन्नतालाई विभाजनको कारण नभई समृद्ध विविधताको धरोहरका रूपमा स्वीकार गर्न आग्रह गरे ।
कुनै पनि अफवाह, उत्तेजना वा हिंसात्मक गतिविधिमा संलग्न नहुन र संवाद, मेलमिलाप तथा सहयोगलाई प्राथमिकता दिन उपराष्ट्रपति यादवले नागरिकलाई अनुरोध गरेका छन् । साथै स्थानीय प्रशासन, धार्मिक अगुवा र नागरिक समाजलाई मिलेर सामाजिक सद्भाव कायम राख्न सक्रिय भूमिका निर्वाह गर्न उनले आग्रह गरे ।
मुलुकको अवस्था संवेदनशील रहेको र निर्वाचनको राष्ट्रिय कार्यभार पूरा गर्नुपर्ने सन्दर्भमा उपराष्ट्रपति यादवले शान्ति, संयम र सद्भाव कायम गर्दै स्वच्छ, निष्पक्ष र भयरहित निर्वाचन सम्पन्न गर्न सबै पक्षलाई जिम्मेवार भूमिका निर्वाह गर्न अपिल गरेका छन् ।