जेनजी समावेशी युवा जागरण पार्टी घोषणा, माग पूरा गर्न सडक संघर्षको चेतावनी

ईमधेश न्यूज सम्वाददाता,
काठमाडौँ, २२ पौष ।
 जेनजी समावेशी युवा जागरण पार्टीको औपचारिक घोषणा भएको छ । जेनजी आन्दोलनका अधुरा एजेण्डा पूरा गर्न सडक संघर्षमा उत्रिने चेतावनी दिँदै पार्टीले नयाँ वैकल्पिक राजनीतिक अभियान सुरु गर्ने घोषणा गरेको हो ।
मंगलबार राजधानीको संवाद डबलीमा आयोजित पत्रकार सम्मेलनमा पार्टीले राजनीतिक, सामाजिक र आर्थिक समस्याविरुद्ध युवाको नेतृत्वमा सशक्त आन्दोलन अघि बढाउने स्पष्ट पारेको छ । पार्टी अध्यक्ष जीपी पोखरेलले युवाको सक्रिय सहभागितामा समावेशी, पारदर्शी र भ्रष्टाचारमुक्त शासन प्रणाली स्थापना गर्नु पार्टीको मुख्य उद्देश्य रहेको बताए ।
उनले बढ्दो बेरोजगारी, भ्रष्टाचार, महँगी, शिक्षा र स्वास्थ्य क्षेत्रमा देखिएका समस्याले जनताको जीवन कष्टकर बन्दै गएको उल्लेख गर्दै ती समस्या समाधान गर्न पुराना दलहरू असफल भएको आरोप लगाए । “युवामुखी नयाँ राजनीतिक शक्तिको आवश्यकता छ,” अध्यक्ष पोखरेलले भने ।
अध्यक्ष पोखरेलले जेनजी आन्दोलनको बलमा बनेको सुशीला कार्की नेतृत्वको सरकार चुनाव गराउनमै सीमित भएको आरोप लगाउँदै जेनजी आन्दोलनको म्यान्डेट बिर्सिएको दाबी गरे । आन्दोलनका उपलब्धि खेर जान नदिन नयाँ पार्टी घोषणा गर्नुपरेको उनको भनाइ थियो । उनले माग पूरा नभए फेरि आन्दोलनमा जान बाध्य नबनाउन सरकारलाई चेतावनीसमेत दिए ।
पार्टीका उपाध्यक्ष डेनिज पोखरेलले सबै जातजाति, भाषा, संस्कृति र वर्गको समान अधिकार सुनिश्चित गर्दै समावेशी लोकतन्त्रलाई बलियो बनाउने पार्टीको लक्ष्य रहेको बताए । शिक्षा र स्वास्थ्य निःशुल्क तथा गुणस्तरीय बनाउन, रोजगारी सिर्जनामा राज्यले अग्रसर भूमिका खेल्न र भ्रष्टाचारमा शून्य सहनशीलताको नीति अपनाउनुपर्ने माग उनले राखे ।
सचिवालय सदस्य डा. रामगोपाल श्रेष्ठले महिला, दलित, आदिवासी जनजाति, अपाङ्गता भएका व्यक्ति तथा पछाडि पारिएका समुदायलाई राज्यका सबै निकायमा समान अवसर दिनुपर्नेमा जोड दिँदै युवालाई वैचारिक रूपमा सचेत भई राजनीतिमा सक्रिय हुन आह्वान गरे ।