पूर्वमन्त्री उमेश यादव जसपा नेपालमा प्रवेश, संगठन थप सुदृढ हुने विश्वास

ईमधेश न्यूज सम्वाददाता,
काठमाडौँ, २२ पौष ।
 नेपाली कम्युनिस्ट पार्टी (नेकपा) का केन्द्रीय सदस्य तथा पूर्व सिँचाइ मन्त्री उमेश कुमार यादव जनता समाजवादी पार्टी (जसपा) नेपालमा औपचारिक रूपमा प्रवेश गरेका छन् । काठमाडौँस्थित जसपा नेपालको केन्द्रीय कार्यालय बालकुमारीमा आयोजित कार्यक्रममा पार्टी अध्यक्ष उपेन्द्र यादवले उनलाई पार्टीमा स्वागत गरेका हुन् ।
पार्टी प्रवेशपछि बोल्दै उमेश यादवले देशको वर्तमान राजनीतिक अवस्था, संघीयताको प्रभावकारी कार्यान्वयन तथा मधेशका अधिकार, पहिचान र सामाजिक न्यायका सवालमा जसपा नेपालको एजेन्डा स्पष्ट र जनमुखी रहेको बताए । यही कारण आफू जसपा नेपालमा आबद्ध भएको उल्लेख गर्दै उनले पार्टीको नीति, सिद्धान्त र कार्यदिशालाई पूर्ण रूपमा अवलम्बन गर्दै सक्रिय भूमिका निर्वाह गर्ने प्रतिबद्धता व्यक्त गरे ।
अध्यक्ष उपेन्द्र यादवले पूर्वमन्त्री उमेशको प्रवेशले पार्टी संगठन थप बलियो बन्ने विश्वास व्यक्त गरे । मधेश आन्दोलन, समावेशी लोकतन्त्र र संघीयताको संस्थागत विकासका लागि अनुभवी नेताहरूको भूमिकाले पार्टीलाई राष्ट्रिय राजनीतिमा अझ प्रभावकारी बनाउने उनको भनाइ थियो ।
लामो समयदेखि वामपन्थी राजनीतिमा सक्रिय उमेश यादव प्रचण्ड नेतृत्वको नेकपामा केन्द्रीय सदस्य रहेका थिए । उनी सप्तरी–२ बाट निर्वाचित संविधानसभा सदस्यसमेत हुन् । विद्यार्थी जीवनदेखि नै राजनीतिमा संलग्न यादवले जनयुद्धका क्रममा विभिन्न नेतृत्वदायी भूमिका निर्वाह गरेका छन् ।
उनले नेकपा (माओवादी)मा सेल कमिटीदेखि केन्द्रीय सदस्यसम्म जिम्मेवारी सम्हालिसकेका छन् । साथै मधेशी राष्ट्रिय मुक्ति मोर्चा सप्तरी संयोजक, जिल्ला जनसरकार प्रमुख, जनमिलिसिया कमिसार, जनमुक्ति सेनाको बटालियन कमिसार तथा वाईसीएल नेपालको मिथिला क्षेत्र संयोजकको भूमिका पनि निर्वाह गरेका छन् ।
कार्यक्रममा जसपाका नेता एवम् पूर्वमन्त्री रेणु कुमारी यादव, महासचिव तथा मधेश प्रदेशका संस्थापक मुख्यमन्त्री लालबाबु राउत, महासचिव रामकुमार शर्मा लगायतका नेताहरूको उपस्थिति रहेको थियो ।