धनुषाको मस्जिद तोडफोड घटनाको विरोधमा वीरगञ्ज तनावग्रस्त

ईमधेश न्यूज सम्वाददाता,
विरगंज, २० पौष ।
धनुषामा मस्जिदमा तोडफोड र धार्मिक ग्रन्थ कुरान जलाइएको घटनाको विरोधमा आइतबार वीरगञ्ज तनावग्रस्त बनेको छ । धनुषाको कमला नगरपालिका–६, सखुवा मरानमा शनिबार भएको उक्त घटनाप्रति आक्रोश व्यक्त गर्दै वीरगञ्जका मुस्लिम समुदाय सडकमा उत्रिएका हुन् ।
प्रदर्शनकारीहरूले जनकपुर घटनाका दोषीलाई कडा कारबाहीको माग गर्दै वीरगञ्जको घण्टाघर, छपकैया लगायतका स्थानमा टायर बालेर प्रदर्शन गरेका थिए । प्रदर्शनका क्रममा केही प्रदर्शनकारीले प्रहरीमाथि ढुङ्गामुढा गर्नुका साथै छपकैया प्रहरी बिटमा तोडफोडसमेत गरेका छन् ।
स्थिति नियन्त्रणबाहिर जान थालेपछि प्रहरीले पाँच राउन्ड अश्रुग्यास प्रहार गरी प्रदर्शनलाई नियन्त्रणमा लिएको जिल्ला प्रहरी कार्यालय पर्साले जनाएको छ । प्रहरीका अनुसार हाल वीरगञ्जको अवस्था सामान्य बन्दै गएको छ र सुरक्षा व्यवस्था कडा पारिएको छ ।
शनिबार धनुषामा भएको घटनामा केही हिन्दु युवाहरूले मस्जिदमा तोडफोड गरी धार्मिक ग्रन्थ जलाएको आरोप छ । यसअघि सामाजिक सञ्जालमा दुई जना मुस्लिम युवाले हिन्दु समुदायको रक्षाबन्धन पर्वप्रति नकारात्मक सन्देश जाने भिडियो पोस्ट गरेका थिए । उक्त भिडियोका कारण उत्पन्न विवादपछि आक्रोशित हिन्दु युवाहरूले प्रहरी चौकी घेराउ गरेका थिए । प्रहरीले भिडियो पोस्ट गर्ने दुवै युवकलाई नियन्त्रणमा लिएर अनुसन्धान थालेको थियो ।
तर अनुसन्धान जारी रहँदै गर्दा केही युवाहरूले मस्जिदमा क्षति पु¥याएपछि स्थिति थप तनावग्रस्त बनेको हो । घटनासम्बन्धी थप अनुसन्धान भइरहेको प्रहरीले जनाएको छ ।