प्राविधिक जनशक्ति कटौती नगर्न वन प्राविधिक संघहरूको वन मन्त्रालयलाई ध्यानाकर्षण

ईमधेश सम्वाददाता,
हेटौँडा, २० पौष । 
 बागमती प्रदेशमा वन तथा वातावरण मन्त्रालय र मातहतका निकायहरूको सङ्गठन तथा व्यवस्थापन (O&M) संरचना पुनर्लेखनको प्रक्रिया अघि बढिरहेको सन्दर्भमा वन क्षेत्रका तीन प्रमुख पेसागत सङ्घसंस्थाले प्राविधिक जनशक्ति कटौती नगर्न माग गर्दै मन्त्रालयको ध्यानाकर्षण गराएका छन् ।
नेपाल वन प्राविधिक सङ्घ (NFA), नेपाल वन प्राविधिक सङ्घ (NEFTA) र जुनियर फरेस्टर्स एसोसिएसन नेपाल (JFAN) बागमती प्रदेश कार्यसमितिले संयुक्त रूपमा बुझाएको ध्यानाकर्षण पत्रमा मौजुदा दरबन्दी कटौती हुँदा वन, वातावरण, वन्यजन्तु तथा जलाधार संरक्षणमा प्रत्यक्ष नकारात्मक असर पर्ने चेतावनी दिइएको छ ।
प्रदेश राष्ट्रिय वन ऐन, २०७६ लगायत अन्य कानुन तर्जुमा भइरहेका बेला O&M संरचना पुनर्लेखन गर्दा बागमती प्रदेशको जैविक विविधता र पर्यावरणीय संवेदनशीलतालाई विशेष ध्यान दिनुपर्ने उनीहरूको माग छ । छोटो समयमै प्राविधिक कार्यालयहरूमा कार्यरत जनशक्ति कटौती गरिए सेवा प्रवाह कमजोर हुने र वातावरणीय संरक्षणमा चुनौती थपिने नेपाल वन प्राविधिक सङ्घ बागमतीका अध्यक्ष उत्तम चापागाईँले बताएका छन् ।
सङ्घसंस्थाले वातावरणीय दिगोपन, जनशक्तिको उचित व्यवस्थापन र सेवाको गुणस्तर सुधारलाई प्राथमिकतामा राखेर मात्र संरचना पुनर्लेखन गर्न आग्रह गरेका छन् । साथै, दरबन्दी कटौतीको सट्टा प्राविधिक जनशक्तिको सीप अभिवृद्धि, क्षमता विकास र प्रोत्साहनका कार्यक्रम अघि बढाउन सुझाव दिएका छन् ।
ध्यानाकर्षण पत्रमा कर्मचारी सङ्घसंस्था, विज्ञ तथा सरोकारवालाको रायलाई समेट्दै व्यापक अध्ययनपछि मात्र निर्णय लिनुपर्ने उल्लेख छ । संयुक्त पत्रमा NFA बागमतीका अध्यक्ष उत्तम चापागाईँ, NEFTA बागमतीका अध्यक्ष वसन्तराज गौतम र JFAN बागमतीका अध्यक्ष राजेश कुमार साहले हस्ताक्षर गरेका छन् ।
वन तथा वातावरण मन्त्रालयले सरोकारवालाको मागलाई गम्भीरतापूर्वक लिनुपर्ने उनीहरूको जोड छ ।