सशस्त्र प्रहरीको गोली लागेर स्थानीयको मृत्यु, पाँच बुँदे सहमतिपछि तनाव कम

लिलाकान्त यादव,
इनरुवा, १७ पौष ।
सुनसरीको कोशी गाउँपालिका–१ मा सशस्त्र प्रहरीको गोली लागेर स्थानीय ४५ वर्षीय विजय साहको मृत्यु भएपछि उत्पन्न तनाव पाँच बुँदे सहमतिसँगै नियन्त्रणमा आएको छ । जिल्ला प्रशासन कार्यालय, सुरक्षा निकाय र पीडित पक्षबीच बिहीबार भएको वार्ताले सहमति जुटेपछि अवस्था सामान्यतर्फ उन्मुख भएको हो ।
बुधबार राति करिब १ बजे भारतबाट सिटी सफारीमा सामान लिएर नेपाल फर्कँदै गरेका साहमाथि सशस्त्र प्रहरीले गोली चलाएको थियो । गोली लागेर गम्भीर घाइते भएका साहको घटनास्थलमै मृत्यु भएको थियो । घटनापछि आक्रोशित स्थानीयले प्रदर्शन गर्दै प्रहरीसँग झडप गरेका थिए भने सशस्त्र प्रहरीको सीमा सुरक्षा पोष्टमा समेत आक्रमण भएको थियो ।
घटनापछि उत्पन्न तनाव समाधानका लागि प्रशासनले पीडित पक्षसँग वार्ता गरेको थियो । वार्ताबाट पाँच बुँदे सहमति भएको जिल्ला प्रहरी कार्यालय सुनसरीका प्रवक्ता डीएसपी चन्द्र खड्काले जानकारी दिए । सहमतिअनुसार सहायक प्रमुख जिल्ला अधिकारीको संयोजकत्वमा सात सदस्यीय छानबिन समिति गठन गरिएको छ । समितिमा नेपाल प्रहरी र राष्ट्रिय अनुसन्धान कार्यालयका प्रतिनिधि रहनेछन् र सात दिनभित्र प्रतिवेदन बुझाउनुपर्नेछ ।
छानबिनमा सुरक्षा अधिकारीको लापरबाही देखिएमा मृतक परिवारलाई नियमानुसार राहत तथा क्षतिपूर्तिका लागि गृह मन्त्रालयमा सिफारिस गरिने सहमति भएको छ । साथै मृतक विजय साहकी श्रीमतीलाई रोजगारीको व्यवस्था गर्न प्रमुख जिल्ला अधिकारीले पहल गर्नेछन् । मृतकका छोराले सशस्त्र प्रहरीमा भर्ना हुन चाहेमा सशस्त्र प्रहरी बल नम्बर १ बराह बाहिनीले नियमानुसार सहयोग गर्ने सहमति पनि भएको छ ।
सहमति भएसँगै शव पोस्टमार्टमका लागि नेपाल प्रहरीलाई बुझाइने र त्यसपछि परिवारले अन्त्येष्टि गर्ने निर्णय भएको छ । प्रशासनले शान्ति कायम राख्न सबै पक्षलाई संयमित रहन आग्रह गरेको छ ।