दीपेन्द्र अग्रवाललाई फसाउने प्रयासमा अदालतको ब्रेक, धरौटीमा रिहा

ईमधेश न्युज सम्वाददाता,
काठमाडौं, १४ पौष ।
 सेयर बजारको प्रमुख नियामक निकाय नेपाल धितोपत्र बोर्ड (सेबोन) का अध्यक्ष सन्तोषनारायण श्रेष्ठको नेतृत्वमा भएको कारबाही प्रयासलाई अदालतले रोक लगाएको छ । सेबोनभित्रको भ्रष्टाचार, अनियमितता र बेथितिविरुद्ध आवाज उठाउँदै आएका चर्चित सेयर कारोबारी तथा ठूला लगानीकर्ता दीपेन्द्र अग्रवाललाई भित्री कारोबारको आरोपमा हिरासतमा राखिरहनु आवश्यक नभएको ठहर गर्दै काठमाडौं जिल्ला अदालतले धरौटीमा रिहा गर्न आदेश दिएको हो ।
अदालतको आदेशसँगै अग्रवाललाई थप हिरासतमा राखेर दुःख दिने तथा कडा सजाय गराउने प्रयासमा ब्रेक लागेको छ । सीआईबी स्रोतका अनुसार अदालतको आदेशपछि उनलाई रिहा गर्ने प्रक्रिया थालिएको छ ।
अग्रवाललाई करिब १० दिनअघि नेपाल धितोपत्र बोर्डको सिफारिसमा केन्द्रीय अनुसन्धान ब्यूरो (सीआईबी) ले काठमाडौंको चुनदेवी क्षेत्रबाट पक्राउ गरेको थियो । सेयरको भित्री कारोबारमा संलग्न भएको आरोप लगाइए पनि अदालतले अनुसन्धानका लागि निरन्तर हिरासत आवश्यक नदेखिएको जनाएको हो ।
पक्राउपछि अग्रवालले सेबोन अध्यक्ष श्रेष्ठले आफूविरुद्ध पूर्वाग्रही ढंगले कारबाही गराएको आरोप लगाउँदै हिरासतभित्रै अनसन तथा भोकहड्तालसमेत गरेका थिए । परिवारले बन्दी प्रत्यक्षीकरणको रिटसमेत दायर गरेको थियो । अदालतको आदेशले अब उनी हिरासतबाहिर रहेर मुद्दा लड्न पाउने भएका छन् ।