रेणु र प्रदीपले छोडे जसपा नेपाल, उपेन्द्र यादवसँग एकता

ईमधेस न्युज सम्वाददाता 
काठमाडौं, १४ पौष ।
 जनता समाजवादी पार्टी (जसपा) नेपालकी सहअध्यक्ष रेणु यादव र उपमहासचिव प्रदीप यादवले पार्टी परित्याग गर्दै अध्यक्ष उपेन्द्र यादव नेतृत्वको जसपासँग एकता गरेका छन् । उनीहरूले लोकतान्त्रिक समाजवादी पार्टी (लोसपा) र जसपाबीचको एकता प्रक्रियालाई स्वीकार गर्दै आज उपेन्द्र यादवसँग सहमति पत्रमा हस्ताक्षर गरेका हुन् ।
हस्ताक्षर गरिएको सहमति पत्रमा मिति २०८२ पुस १३ गते जनता समाजवादी पार्टी, नेपाल र रेणु यादवको नेतृत्वमा रहेका बहुमत केन्द्रीय सदस्यहरू सहितको समूह जसपा नेपालसँग औपचारिक रूपमा एकीकरण गरिएको उल्लेख छ । सहमति अनुसार पार्टी एकताले मधेश केन्द्रित राजनीतिक शक्तिलाई थप मजबुत बनाउने विश्वास लिइएको छ ।
एकता पछि प्रतिक्रिया दिँदै नेतृ रेणु यादवले मधेश, दलित, पिछडिएका समुदाय तथा उत्पीडित वर्गको अधिकारका लागि एउटै शक्तिशाली राजनीतिक प्लेटफर्म आवश्यक रहेको बताइन् । उनले विभाजित शक्तिहरू एक ठाउँमा आएर राजनीतिक स्थायित्व र समावेशी लोकतन्त्रका लागि काम गर्नुपर्ने आवश्यकता औंल्याइन् ।
उपमहासचिव प्रदीप यादवले पनि वैचारिक स्पष्टता र संगठनात्मक मजबुतीका लागि एकता अपरिहार्य भएको बताए । उनले मधेश आन्दोलनका उपलब्धिहरूलाई संस्थागत गर्न साझा राजनीतिक अभियान आवश्यक रहेको धारणा राखे ।
जसपा अध्यक्ष उपेन्द्र यादवले एकताले पार्टीलाई राष्ट्रिय राजनीतिमा अझ प्रभावकारी बनाउने विश्वास व्यक्त गर्दै नयाँ जिम्मेवारीका साथ अघि बढ्ने प्रतिबद्धता जनाए । पार्टी एकतासँगै मधेश केन्द्रित राजनीतिमा नयाँ समीकरणको संकेत देखिएको छ ।