अन्तिम मतदाता नामावली प्रकाशन, मतदाता संख्या करिब १ करोड ८९ लाख

ईमधेस न्युज सम्वाददाता 
काठमाडौं, १४ पौष ।
 निर्वाचन आयोगले संवत् २०८२ फागुन २१ गते हुने प्रतिनिधि सभा सदस्य निर्वाचनका लागि अन्तिम मतदाता नामावली प्रकाशन गरेको छ । मतदाता नामावली ऐन, २०७३ को दफा २० बमोजिम आयोगको निर्णयअनुसार आवश्यक प्रक्रिया पूरा गरी नामावली सार्वजनिक गरिएको हो ।
आयोगका अनुसार २०८२ फागुन २० गतेसम्म १८ वर्ष पूरा गरेका नागरिकहरूको विवरण अद्यावधिक गरी अन्तिम मतदाता नामावली तयार गरिएको छ । प्रकाशित नामावलीमा पुरुष ९६ लाख ६३ हजार ३५८, महिला ९२ लाख ४० हजार १३१ र अन्य २०० जना गरी कुल १ करोड ८९ लाख ३ हजार ६८९ मतदाता समावेश भएका छन् । मतदाताले आयोगको आधिकारिक वेबसाइटमार्फत आफ्नो नाम विवरण हेर्न सक्ने व्यवस्था गरिएको छ ।
वि.सं. २०७९ मा सम्पन्न प्रतिनिधि सभा तथा प्रदेश सभा निर्वाचनको तुलनामा यस पटक कुल मतदाता संख्या ९ लाख १५ हजार ११९ ले वृद्धि भएको छ । यस अवधिमा पुरुष मतदाता ५ लाख २२ हजार ५५२, महिला मतदाता ३ लाख ९२ हजार ५५२ र अन्य मतदाता १५ ले बढेका छन् ।
निर्वाचन प्रयोजनका लागि देशभर १० हजार ९६७ मतदान स्थलमा २३ हजार ११२ मतदान केन्द्र निर्धारण गरिएको आयोगले जनाएको छ । अघिल्लो निर्वाचनको तुलनामा मतदान स्थल ७५ र मतदान केन्द्र ८८५ ले वृद्धि भएका छन् ।