राष्ट्रिय ज्येष्ठ नागरिक दिवसमा उपराष्ट्रपतिको सम्मान र प्रतिबद्धता

लिलाकान्त यादव, 
काठमाडौं, ११ पौष ।
राष्ट्रिय ज्येष्ठ नागरिक दिवस, २०८२ को अवसरमा उपराष्ट्रपति रामसहाय प्रसाद यादवले सम्पूर्ण ज्येष्ठ नागरिकप्रति उच्च सम्मान व्यक्त गर्दै सुस्वास्थ्य, दीर्घायु र गरिमामय जीवनको शुभकामना दिनुभएको छ। वि.सं. २०५१ पुस ११ गते सामाजिक सुरक्षा भत्ता सुरु गरिएको दिनको स्मरणमा मनाइने यो दिवसले ज्येष्ठ नागरिकप्रतिको राज्य र समाजको दायित्व पुनः स्मरण गराउने उहाँको भनाइ छ।
शुभकामना सन्देशमा उपराष्ट्रपति यादवले ज्येष्ठ नागरिकको त्याग, सेवा र योगदान समाजको अमूल्य सम्पत्ति भएको उल्लेख गर्नुभयो। संविधान तथा ज्येष्ठ नागरिक सम्बन्धी ऐन २०६३ ले उनीहरूको विशेष संरक्षण, सामाजिक सुरक्षा र स्वास्थ्य सेवाको अधिकार सुनिश्चित गरेको बताउँदै ती अधिकार प्रभावकारी कार्यान्वयनमा जोड दिनुभयो।
उहाँले युवापुस्ताले ज्येष्ठ नागरिकलाई अनुभव र मार्गदर्शनका स्रोतका रूपमा सम्मान गर्नुपर्ने र परिवार तथा समाजमा उनीहरूको गरिमा कायम राख्न सबैको साझा प्रयास आवश्यक रहेको धारणा व्यक्त गर्नुभयो।