क्रिसमस–डे : प्रेम, शान्ति र सौहार्द्यको महान् पर्व

आज विश्वभर इसाई धर्मावलम्बीहरूले प्रेम, शान्ति र खुसीको पर्व क्रिसमस–डे हर्षोल्लासका साथ मनाइरहेका छन् । इसाई धर्मका प्रवर्तक प्रभु येशू ख्रीष्टको जन्मदिनका रूपमा प्रत्येक वर्ष डिसेम्बर २५ मा मनाइने यो पर्व मानवता, करुणा र आपसी सद्भावको सन्देश बोकेर आउने गर्छ । धेरै मुलुकहरूमा आज सार्वजनिक बिदा दिइने भएकाले क्रिसमस विश्वव्यापी चाडका रूपमा स्थापित छ ।
क्रिसमसको चर्चा गर्दा जिंगल बेल गीत र घन्टीको धुन स्वतः सम्झनामा आउँछ । सैयौँ साना घन्टीबाट निस्कने “जिंग–जिंग” आवाजले उत्सवको वातावरण सिर्जना गर्छ । औद्योगिक क्रान्तिपछिका वर्षहरूमा गाडी र गाडामा यस्ता घन्टी प्रयोग गरेर बाटोमा हिँड्ने मानिसलाई संकेत दिने चलनसमेत थियो । कालो र गोरा समुदायले एकैसाथ गाएको पहिलो गीतमध्ये मानिने जिंगल बेल आज पनि क्रिसमसको प्रतीक बनेको छ ।
हिउँदको मध्य समयमा मनाइने यो पर्व हिउँ, चिसो सिरेटो र न्यानो आगोसँग जोडिएको छ । विभिन्न ऐतिहासिक दस्तावेजअनुसार येशूको जन्मभन्दा पहिलेदेखि नै युरोपमा आगो र प्रकाशको पर्व मनाउने चलन थियो, जसले समयक्रममा क्रिसमसको रूप लियो । आज संसारभर उपहार साटासाट, भोजभतेर, गिर्जाघरमा प्रार्थना र सामूहिक उत्सवमार्फत क्रिसमस मनाइन्छ ।
क्रिसमसको अर्को प्रमुख आकर्षण क्रिसमस–ट्री हो । सानो धुपीजस्तै देखिने यो रुख सजाएर घर–घरमा राखिन्छ । अमेरिकामात्रै हरेक वर्ष करोडौँ क्रिसमस–ट्री किनबेच हुने गर्छन्, जसलाई तयार हुन कम्तीमा १०–१५ वर्ष लाग्ने तथ्य उल्लेखनीय छ । त्यस्तै, रातो पोशाक, सेतो दाह्री र हाँसिलो अनुहारका सान्टा क्लस बालबालिकाका लागि विशेष आकर्षण हुन् । उपहार बाँड्ने विश्वासका कारण धेरै बालबालिका सान्टाको प्रतीक्षामा रातभर जाग्राम बस्छन् ।
चाडपर्वलाई केवल धार्मिक सीमामा सीमित नगरी संस्कार, संस्कृति र आपसी सद्भावको प्रतीकका रूपमा बुझ्नु आवश्यक छ । नेपालमा रहेका इसाई धर्मावलम्बीहरू मात्र होइन, सबै नेपालीका लागि क्रिसमस खुसी, मेलमिलाप र मानवताको पर्व बनोस् ।
मेरी क्रिसमस !