क्रिसमस पर्व २०२५ का अवसरमा उपराष्ट्रपति यादवद्वारा शुभकामना

लिलाकान्त यादव, 
काठमाडौं, १० पौष ।
 उपराष्ट्रपति रामसहाय प्रसाद यादवले क्रिसमस पर्व २०२५ को अवसरमा स्वदेश तथा विदेशमा रहेका सम्पूर्ण नेपाली दिदीबहिनी तथा दाजुभाइहरूमा सुख, शान्ति र समृद्धिको कामना व्यक्त गर्नुभएको छ । पुस १० गते जारी शुभकामना सन्देशमा उहाँले क्रिसमस पर्वले शान्ति, प्रेम, करुणा र सहअस्तित्वको सन्देश प्रवाह गर्दै मानवता र सामाजिक सद्भावलाई सुदृढ बनाउँदै आएको उल्लेख गर्नुभएको छ ।
उपराष्ट्रपति यादवले इसा मसीहको जन्म दिवसका रूपमा विश्वभर मनाइने क्रिसमस पर्वले धार्मिक सहिष्णुता, समानता र सामाजिक न्यायका मूल्यहरूलाई प्रवद्र्धन गर्ने बताउनुभयो । नेपाल बहुजातीय, बहुभाषिक, बहुधार्मिक तथा बहुसांस्कृतिक मुलुक भएकाले विविध चाडपर्वहरूले ‘विविधतामा एकता’ को भावना मजबुत बनाउने उहाँको भनाइ छ ।
सन्देशमा उहाँले क्रिसमस पर्वको धार्मिक, सामाजिक र सांस्कृतिक महत्व उल्लेख गर्दै यसले परिवार, समुदाय र समाजबीच आपसी सद्भाव बढाउने बताउनुभएको छ । साथै, व्यापार, पर्यटन र आर्थिक गतिविधिमा सकारात्मक प्रभाव पार्दै मुलुकको आर्थिक विकासमा समेत योगदान पु¥याउने उल्लेख गर्नुभएको छ ।
उपराष्ट्रपति यादवले विपन्न, असहाय तथा सीमान्तकृत समुदायप्रति करुणा र सहयोगको भावना अभिवृद्धि गर्न क्रिसमस पर्वले प्रेरणा दिने बताउँदै सामाजिक न्याय, समावेशिता र राष्ट्रिय एकताको संकल्पका साथ समृद्ध नेपाल निर्माणतर्फ अघि बढ्न सबैलाई आह्वान गर्नुभएको छ ।