जसपा नेपाल र स्वाधीन मधेश जनअभियानबीच कार्यगत एकता घोषणा

काठमाडौं, पुस ९ — जनता समाजवादी पार्टी (जसपा) नेपाल र स्वाधीन मधेश जनअभियानबीच कार्यगत एकता घोषणा गरिएको छ। दुबै पक्षले हालका लागि कार्यगत एकता गर्दै संयुक्त रूपमा संघर्षका कार्यक्रम अघि बढाउने र भविष्यमा आवश्यकता अनुसार संगठनात्मक एकतासमेत गर्न सक्ने सहमति गरेका छन्। सोमबार जसपा नेपाल केन्द्रीय कार्यालय बालकुमारीमा आयोजित कार्यक्रममा जसपा नेपालका अध्यक्ष उपेन्द्र यादव र स्वाधीन मधेश जनअभियानका संयोजक कैलाश महतोले कार्यगत एकताको घोषणापत्रमा हस्ताक्षर गरेका हुन्। कार्यक्रममा दुबै पक्षका नेताहरूले साझा मुद्दा र लक्ष्यका आधारमा एकताबद्ध संघर्ष आवश्यक रहेको बताएका थिए। घोषणापत्रमा पूर्ण समानुपातिक निर्वाचन प्रणाली स्थापना गर्न संयुक्त संघर्ष गर्ने प्रतिबद्धता जनाइएको छ। साथै स्थानीय तहलाई विकास निर्माणको प्रमुख आधारका रूपमा स्थापित गर्न दलबिहीन निर्वाचन प्रणालीको पक्षमा अभियान सञ्चालन गर्ने सहमति भएको छ। नेपालको संविधानलाई अधुरो, अपुरो तथा विभेदकारी ठहर गर्दै त्यसको संशोधन, परिमार्जन तथा आवश्यक परे पुनर्लेखनका लागि निरन्तर संघर्ष गर्ने उल्लेख घोषणापत्रमा छ। विविध जात, जाति, भाषा, धर्म, संस्कृति र पहिचान भएका समुदायलाई समेट्ने समावेशी राज्य–राष्ट्र अवधारणा स्थापित गर्न संयुक्त प्रयास गर्ने सहमति गरिएको छ। मधेश जनविद्रोहबाट स्थापित संघीय शासन प्रणालीलाई थप सुदृढ गर्दै प्रदेशलाई अधिकारसम्पन्न बनाउने, साथै मधेशी, दलित, महिला, जनजाति, खस, मुस्लिम, अल्पसंख्यक तथा पिछडावर्गको अधिकार, पहिचान र सम्मानका लागि निरन्तर संघर्ष गर्ने प्रतिबद्धता पनि घोषणापत्रमा उल्लेख गरिएको छ।