यूएईमा मृत्युदण्डको सजाय पाएका अमरबहादुर बम निर्दोष रहेको दाबी, बचाउका लागि सरकारसँग पहलको माग

ईमधेस न्युज सम्वाददाता 
काठमाडौं, ०९ पौष ।
युएईको दुबई अदालतले मृत्युदण्डको फैसला सुनाएका दार्चुला जिल्ला दुहुँ गाउँपालिका–धारीका अमरबहादुर बम निर्दोष रहेको दाबी गर्दै उनको रिहाइका लागि अभियान सुरु गरिएको छ । बुधबार राजधानीको संवाद डबलीमा आयोजित पत्रकार सम्मेलनमार्फत अभियन्ताहरूले नेपाल सरकारले कूटनीतिक पहल नगरे कडा संघर्षका कार्यक्रम अघि बढाउने चेतावनी दिएका छन् ।
अभियन्ता रजमान तामाङले २२ वर्षदेखि निर्दोष हुँदाहुँदै पनि अमरबहादुर बमले मृत्युदण्डको सजाय कुर्नु राज्यको गैरजिम्मेवारीको परिणाम भएको आरोप लगाए । “नागरिकप्रतिको बेवास्ता र विदेशी भूमिमा हजारौँ नेपाली मर्न बाध्य हुने अवस्थाप्रति हामी खेद प्रकट गर्छौं,” उनले भने ।
अभियन्ता जन्मदेव जैसीले सरकारको ध्यानाकर्षण गराउन देशव्यापी अभियान सुरु गरिएको जानकारी दिए । दार्चुलाका स्थानीय तथा बमका छिमेकी करनसिंह बडालले बमको परिवार र आफन्तले पटक–पटक सरकार र राजनीतिक दलहरू गुहारे पनि न्याय नपाएकाले संघर्षमा उत्रिनु परेको बताए ।
अमरबहादुर बम सन् २००३ मा युएईमा भएको गोलीकाण्डमा संलग्न रहेको आरोपमा दोषी ठहर भएका हुन् । तर घटनामा संलग्न दुई भारतीय नागरिकले नै बम निर्दोष रहेको लिखित बयान अदालतमा दिइसकेकाले नेपाल सरकारले पहल गरे मृत्युदण्ड रोक्न सकिने अभियन्ताहरूको दाबी छ ।
अभियानअन्तर्गत प्रधानमन्त्रीलाई ज्ञापनपत्र, सामाजिक सञ्जाल अभियान, युएई दूतावासलाई पत्र, हस्ताक्षर संकलनलगायत कार्यक्रम सार्वजनिक गरिएका छन् ।