मन्त्री कुलमान घिसिङको १०० दिन : तीन मन्त्रालयमा १०१ कामको प्रगति सार्वजनिक

ईमधेस न्युज सम्वाददाता 
काठमाडौं,०९ पौष ।
 जेन–जी आन्दोलनपछि गठित सरकारमा तीन महत्वपूर्ण मन्त्रालयको जिम्मेवारी सम्हालेका मन्त्री कुलमान घिसिङले आफ्नो १०० दिने कार्यकालमा सम्पन्न १०१ प्रमुख कामको विवरण सार्वजनिक गर्नुभएको छ । ऊर्जा, जलस्रोत तथा सिँचाइ, भौतिक पूर्वाधार तथा यातायात र सहरी विकास मन्त्रालयको नेतृत्व गर्दै घिसिङले ‘भाषणभन्दा नतिजा’ लाई प्राथमिकतामा राखेर काम गरिएको दाबी गर्नुभएको छ ।
मन्त्री घिसिङले वर्षौँदेखि अलपत्र परेका करिब १७ अर्ब रुपैयाँ बराबरका ६६ वटा रुग्ण ठेक्का रद्द गरी विकास आयोजनामा देखिएको जकड तोडिएको जानकारी दिनुभयो । १२०० मेगावाटको बुढीगण्डकी र १०६३ मेगावाटको माथिल्लो अरुण जलविद्युत आयोजना स्वदेशी लगानीमै अघि बढाउने गरी वित्तीय ढाँचा तयार गरिएको छ । डेडिकेटेड तथा ट्रंक लाइनको बक्यौता महसुल उठाउन राजनीतिक हस्तक्षेप अन्त्य गर्दै उद्योगीहरूलाई किस्ताबन्दीमा महसुल तिर्न बाध्य बनाइएको पनि उहाँको दाबी छ ।
भौतिक पूर्वाधारतर्फ सडक, पुल, सुरुङ मार्ग र रेल आयोजनामा गति दिइएको छ भने विपी राजमार्ग, तातोपानी नाका र प्रमुख राजमार्गहरू पुनः सञ्चालनमा ल्याइएको छ । यातायात व्यवस्थापन सुधार, स्मार्ट लाइसेन्स छपाइ, सडक सुरक्षा योजना र सार्वजनिक यातायातलाई व्यवस्थित बनाउने काम पनि अघि बढाइएको छ ।
सहरी विकास मन्त्रालयअन्तर्गत जेन–जी आन्दोलनबाट क्षतिग्रस्त संरचनाको पुनर्निर्माण, बञ्चरेडाँडा फोहोर व्यवस्थापन, बागमती नदी सफाइ, कीर्तिपुर क्रिकेट रंगशाला निर्माण तथा काठमाडौं भिजन २०४० जस्ता दीर्घकालीन योजनामा उल्लेखनीय प्रगति भएको जनाइएको छ ।
“म मन्त्री होइन, जनताको सेवकका रूपमा काम गरिरहेको छु,” घिसिङले भन्नुभयो, “ढिलासुस्ती र लापरबाहीसँग कुनै सम्झौता हुँदैन।”