राष्ट्रिय सभा सदस्य निर्वाचनका लागि सात निर्वाचन अधिकृत नियुक्त

ईमधेस न्युज सम्वाददाता 
काठमाडौं,०९ पौष ।
 निर्वाचन आयोगले मिति २०८२ माघ ११ गते हुने राष्ट्रिय सभा सदस्य निर्वाचनका लागि सात जना निर्वाचन अधिकृत नियुक्त गरेको छ । राष्ट्रिय सभा सदस्य निर्वाचन ऐन, २०७५ को दफा ७ बमोजिम आयोगको मिति २०८२ पुस ७ गतेको बैठकले उक्त निर्णय गरेको हो ।
निर्णयअनुसार कोशी प्रदेशका लागि मोरङ जिल्ला अदालतका न्यायाधीश भिष्मराज प्रसाईं, मधेश प्रदेशका लागि धनुषा जिल्ला अदालतका न्यायाधीश शुभाषबाबु पुरी, बागमती प्रदेशका लागि मकवानपुर जिल्ला अदालतकी न्यायाधीश गीता श्रेष्ठ, गण्डकी प्रदेशका लागि कास्की जिल्ला अदालतका न्यायाधीश हिमलाल वेल्वासे, लुम्बिनी प्रदेशका लागि दाङ जिल्ला अदालतका न्यायाधीश प्रकाशप्रसाद पण्डित, कर्णाली प्रदेशका लागि सुर्खेत जिल्ला अदालतका न्यायाधीश दीपक ढकाल र सुदूरपश्चिम प्रदेशका लागि कैलाली जिल्ला अदालतका न्यायाधीश भुवनसिंह थापा निर्वाचन अधिकृत नियुक्त भएका छन् ।
नियुक्त निर्वाचन अधिकृतहरूको कार्यकाल मिति २०८२ पुस १५ गतेदेखि लागू हुने आयोगले जनाएको छ । साथै, उनीहरूले मिति २०८२ पुस १६ गते सम्बन्धित प्रदेशको प्रदेश निर्वाचन कार्यालयमा निर्वाचन अधिकृतको कार्यालय स्थापना गर्ने कार्यक्रम रहेको आयोगका सहसचिव तथा प्रवक्ता नारायण प्रसाद भट्टराईले जानकारी दिनुभयो ।