अल जेन मुमेन्टः सुशीला कार्की हटाएर सर्वपक्षीय राष्ट्रिय अन्तरिम सरकार गठन गर्नुपर्छ

ईमधेस न्युज सम्वाददाता 
काठमाडौं,०६ पौष ।
 सुशीला कार्की नेतृत्वको सरकारले देशलाई निकास दिन नसक्ने भन्दै अल जेन मुमेन्ट नेपालले सर्वपक्षीय राष्ट्रिय अन्तरिम सरकार गठनको माग गरेको छ । सोमबार राजधानीको संवाद डबलीमा आयोजित पत्रकार सम्मेलनमा मुमेन्टले आफ्नो शान्तिपूर्ण प्रदर्शनमा गरिएको धरपकडलाई गैरन्यायिक रहेको आरोप लगायो।
अल जेन मुमेन्टका मेग खत्रीले आईतबार सिंहदरबारको दक्षिण गेटमा गरिएको प्रदर्शनमा प्रहरी प्रशासनले हस्तक्षेप गरेको भन्दै आक्रोश व्यक्त गरे। उनले वर्तमान सरकारले पुरानै भ्रष्टाचार र बेथितिलाई निरन्तरता दिँदै आएको दाबी गरे। हरिकृष्ण गजुरेलले पनि वर्तमान सरकार पुरानै शैलीमै गएको बताउँदै भने, “सुशीला कार्की नेतृत्वको सरकार हटाएर सर्वपक्षीय राष्ट्रिय सरकार बनाउनु बाहेक विकल्प छैन।”
माधव ठकुरीले जेनजीले बनाएको सरकार आफ्नै मागको विरोधमा गएकोले देशमा द्वन्द्व बढ्ने चिन्ता व्यक्त गरे भने डा. शम्भू पोखरेलले धरपकड गैरकानुनी भएको भन्दै माफी माग्नुपर्ने माग गरे। जनक थापाले संविधान प्रदत्त अधिकार कुण्ठित हुँदा ठूलो विद्रोह उठ्ने चेतावनी दिए।
अशोक रानामगरले राष्ट्रिय मुक्तिका लागि अल जेन मुमेन्टले नेतृत्व लिएर राजनीतिक निकास दिने दाबी गरे। आइतबार प्रदर्शनका क्रममा हरिकृष्ण गजुरेल, माधव ठकुरी, अशोक रानामगर र जनक थापा पक्राउ परेका थिए।