मधेश प्रदेशसभाका सभामुख रामआशिष यादवद्वारा पदभार ग्रहण

ईमधेश न्इूज सम्वाददाता,
जनकपुरधाम,०६ पौष ।
मधेश प्रदेशसभाका नवनियुक्त सभामुख रामआशिष यादवले सोमबार औपचारिक रूपमा पदभार ग्रहण गर्नुभएको छ । जनकपुरधामस्थित प्रदेशसभा सचिवालयमा आयोजित कार्यक्रममा उहाँले सभामुखको जिम्मेवारी सम्हाल्दै अब आफू कुनै दलको प्रतिनिधि नभई सम्पूर्ण प्रदेशसभाको साझा र निष्पक्ष अभिभावकका रूपमा काम गर्ने स्पष्ट प्रतिबद्धता व्यक्त गर्नुभयो ।
पदभार ग्रहणपछि सञ्चारकर्मीहरूसँग कुरा गर्दै सभामुख यादवले संसदीय गरिमा, अनुशासन र निष्पक्षतालाई उच्च प्राथमिकतामा राख्ने बताउनुभयो । “राजनीतिमा मतभेद स्वाभाविक कुरा हो, तर प्रदेशको समग्र हितका लागि संवाद, सहकार्य र सहमति अपरिहार्य छ,” उहाँले भन्नुभयो । प्रदेशसभालाई बहस र समाधानमुखी मञ्चका रूपमा विकास गर्न आफू केन्द्रित रहने उहाँको भनाइ थियो ।
सभामुख यादवले आफ्नो कार्यकालमा मधेशका आधारभूत र दीर्घकालीन मुद्दाहरूलाई सदनको प्राथमिक एजेन्डा बनाइने जानकारी दिनुभयो । समावेशिता, सुशासन, शिक्षा र स्वास्थ्य सेवामा पहुँच, रोजगारी सिर्जना, वातावरण संरक्षण तथा सीमावर्ती क्षेत्रसँग सम्बन्धित समस्याहरू संसद्मा मुख्य बहसका विषय बन्ने उनले बताए ।
संसद्ले कार्यपालिकामाथि प्रभावकारी निगरानी राख्नुपर्नेमा जोड दिँदै सभामुख यादवले बजेट कार्यान्वयन, सार्वजनिक खर्चको पारदर्शिता र उत्तरदायित्व सुनिश्चित गर्न प्रदेशसभा थप सशक्त हुने उल्लेख गर्नुभयो । “सभामुखको कुर्सी राजनीतिक आग्रह–पूर्वाग्रहभन्दा माथि हुन्छ,” उहाँले भन्नुभयो, “संविधान, कानुन र नियमावलीको पूर्ण पालना गराउँदै प्रदेशसभालाई जनउत्तरदायी बनाउनु मेरो दायित्व हो ।”
सभामुख यादवले विषयगत समितिहरूलाई सक्रिय बनाउने, विधेयकहरूमाथि गहन छलफल गराउने र सदनमा स्वस्थ बहसको संस्कृति विकास गर्ने प्रतिबद्धता समेत जनाउनुभयो ।