हराएका चार बालबालिका प्रहरीले सकुशल फेला पारी अभिभावकलाई बुझायो

लिलाकान्त यादव,
राजविराज, ०७ पौष ।
 सप्तरी जिल्लाबाट हराएका चार जना बालबालिकालाई प्रहरीले सकुशल फेला पारी उनीहरूका अभिभावकलाई जिम्मा लगाएको छ ।
जिल्ला सप्तरी तिरहुत गाउँपालिका–३ गोईठी टोल निवासी बिरेन्द्र सरदारकी करिब ७ वर्षीया छोरी सृष्टि कुमारी सरदार, चन्दर सरदारकी करिब ७ वर्षीया छोरी वर्षा कुमारी सरदार, रामचन्द्र सरदारकी करिब ८ वर्षीया छोरी आरोसी सरदार र उनका करिब ६ वर्षीय छोरा कृष्ण सरदार घरमा कसैलाई जानकारी नदिई हिँडेपछि हराएका थिए । उनीहरू फुफुको घर हनुमाननगर जान्छु भन्दै घरबाट निस्किएको बुझिएको थियो ।
बालबालिका लामो समयसम्म घर नफर्किएपछि आफन्त तथा गाउँघरमा खोजतलास गर्दा फेला नपरेको भन्दै बिरेन्द्र सरदारलगायतले इलाका प्रहरी कार्यालय भारदह सप्तरीमा मौखिक जानकारी गराएका थिए । सूचनापछि प्रहरी नायव उपरीक्षक डम्बर बहादुर पुरीको कमाण्डमा खटिएको प्रहरी टोलीले खोजतलास सुरु गरेको थियो ।
खोजतलासका क्रममा मिति २०८२÷०९÷०७ गते बिहान करिब ७ः५५ बजे ती बालबालिका भारदहबाट कोशी ब्यारेजतर्फ पैदल जाँदै गरेको अवस्थामा कोशी पुलछेउबाट फेला परेका थिए । प्रहरीले उनीहरूलाई इलाका प्रहरी कार्यालय भारदह ल्याई बिहान करिब ९ः३० बजे अभिभावकलाई जिम्मा लगाएको जनाएको छ ।
प्रहरीले बालबालिकाको सुरक्षाप्रति सचेत रहन अभिभावकहरूलाई आग्रह गरेको छ ।