डा. डीआर उपाध्यायलाई भारतमा प्रतिभाश्री अवार्ड प्रदान

ईमधेस न्युज सम्वाददाता 
काठमाडौं,०७ पौष ।
 विश्व कीर्तिमानी गीतकार तथा उपन्यासकार डा. डीआर उपाध्यायलाई भारतमा प्रतिभाश्री अवार्ड प्रदान गरिएको छ । भारतको लखनउमा आयोजित विशेष समारोहमा सांसद तथा विभिन्न विशिष्ट व्यक्तित्वहरूको उपस्थितिमा डा. उपाध्यायलाई उक्त अवार्ड प्रदान गरिएको हो ।
गीत, साहित्य र सिर्जनात्मक क्षेत्रमा डा. उपाध्यायले पु¥याएको उल्लेखनीय योगदानको कदर गर्दै प्रतिभाश्री अवार्ड प्रदान गरिएको आयोजक संस्थाले जनाएको छ । सो अवसरमा अन्य विभिन्न क्षेत्रका विशिष्ट व्यक्तित्वहरूलाई पनि सम्मान गरिएको थियो ।
यसैबीच, डा. उपाध्यायलाई हालै युरोपको आइआइइचएसआर (क्ष्क्ष्भ्ज्क्च्) विश्वविद्यालयले मानार्थ विद्यावारिधि (डी.लिट.) प्रदान गरेको छ । साहित्य क्षेत्रमा विशिष्ट योगदानको मूल्याङ्कन गर्दै विश्वविद्यालयका प्रतिनिधि जेम्स केरी तथा अन्य प्रतिष्ठित अतिथिहरूले उनलाई उक्त मानार्थ विद्यावारिधि प्रदान गरेका हुन् ।
समाजशास्त्र विषयमा सन् २००० मा विद्यावारिधि हासिल गरिसकेका डा. उपाध्यायलाई यसअघि अमेरिकालगायत विश्वका विभिन्न आठ विश्वविद्यालयले मानार्थ विद्यावारिधि प्रदान गरिसकेका छन् । युरोपको आइआइइचएसआर विश्वविद्यालयबाट प्राप्त यो उनको नवौं मानार्थ विद्यावारिधि हो ।
डा. उपाध्यायले गीत, संगीत र साहित्यका विविध विधामा हालसम्म १५३ वटा विश्व कीर्तिमान कायम गरिसकेका छन् । उनका एक दर्जनभन्दा बढी उपन्यास, तीनवटा गीति पुस्तक र ३६ वटा संगीत एल्बम सार्वजनिक भइसकेका छन् । करिब २५० गीत सिर्जना गरिसकेका उपाध्यायका सयौं गीतका म्युजिक भिडियोसमेत सार्वजनिक भएका छन् ।
उनको पछिल्लो उपन्यास ‘आशक्ति’ हो । राष्ट्रिय तथा अन्तर्राष्ट्रिय स्तरमा निरन्तर सम्मानित हुँदै आएका डा. उपाध्यायको योगदानले नेपाली गीत–साहित्यलाई विश्वस्तरमा चिनाउन महत्वपूर्ण भूमिका खेलेको सांस्कृतिक क्षेत्रका व्यक्तित्वहरूले बताएका छन् ।