शिक्षक र पत्रकारिताबाट मधेशको सभामुखसम्म रामआशिष यादव

ईमधेश न्इूज सम्वाददाता,
जनकपुरधाम,०६ पौष ।
 मधेश प्रदेशको सभामुखमा जनता समाजवादी पार्टी (जसपा) नेपालका रामआशिष यादव निर्वाचित भएका छन् । आइतबार बसेको मधेश प्रदेशसभा बैठकमा मत विभाजन प्रक्रियामार्फत उनी सभामुख निर्वाचित भएका हुन् । मत विभाजनमा यादवको पक्षमा ७२ मत र विपक्षमा २४ मत परेको थियो । बैठकमा ९६ जना सांसद उपस्थित थिए ।
सातदलीय गठबन्धनका तर्फबाट सभामुखका उम्मेदवार रहेका यादवलाई निर्वाचित गरियोस् भन्ने प्रस्ताव कांग्रेस सांसद वीरेन्द्रप्रसाद सिंहले पेस गरेका थिए । बहुमत ५४ भन्दा बढी मत प्राप्त गरेपछि सभामुखको आसनमा बसेकी उपसभामुख बबिता राउत इशरले यादव निर्वाचित भएको घोषणा गरिन् । यससँगै नेकपा एमालेका उम्मेदवार त्रिलोकीप्रसाद यादवको प्रस्ताव अघि बढेन ।
धनुषा–२ (ख) बाट दोस्रो पटक प्रदेशसभा सदस्य निर्वाचित यादव यसअघि जसपा नेपालको प्रमुख सचेतकको जिम्मेवारीमा थिए । अब उनी मधेश प्रदेशको नीति निर्माण र संसदीय सञ्चालनको प्रमुख भूमिकामा पुगेका छन् ।
२०२६ साल चैत १५ गते धनुषाको जनकपुरधाम उपमहानगरपालिका–१७ मा जन्मिएका यादवको यात्रा शिक्षक र पत्रकारिताबाट सुरु भएको हो । स्नातक तहसम्म अध्ययन गरेका उनले २०५० सालमा शिक्षकका रूपमा करियर थाले । पछि पत्रकारितामा प्रवेश गर्दै रेडियो नेपाल, गोरखापत्र, अन्नपूर्ण पोस्ट, इमेज टेलिभिजनलगायत सञ्चारमाध्यममा काम गरे । उनी जनकपुर एफएम, तहल्का नेपाल र जनकपुर टिभीका संस्थापकसमेत हुन् ।
पत्रकारितामार्फत सामाजिक पहिचान बनाएका यादवले गंगासागर सरसफाइ अभियान र महागंगा आरतीको सुरुवात गरेर जनकपुरधामको धार्मिक तथा पर्यटकीय प्रवद्र्धनमा योगदान दिए । २०७४ सालमा राजनीतिमा प्रवेश गरेका उनी सक्रियता, शालीन स्वभाव र सामाजिक मुद्दामा निरन्तर भूमिकाका कारण दुई पटक उत्कृष्ट सांसदबाट सम्मानित भएका छन् ।