पुस्तान्तरण नेपालद्वारा आयोजित स्वास्थ्य तथा मनोसामाजिक शिविरमा सयभन्दा बढी ज्येष्ठ नागरिक लाभान्वित

ईमधेश न्यूज सम्वाददाता,
काठमाडौं, ०६ पौष ।
 पुस्तान्तरण नेपालले आयोजना गरेको निशुल्क स्वास्थ्य तथा मनोसामाजिक मनोपरामर्श शिविरबाट काभ्रेपलाञ्चोकको पाँचखाल नगरपालिकाका सयभन्दा बढी ज्येष्ठ नागरिक लाभान्वित भएका छन् । पाँचखाल नगरपालिकाको समन्वय तथा आर्थिक विकास मित्र ऋण सहकारी संस्थाको सहकार्यमा पाँचखाल नगरपालिका कार्यालय परिसरमा बिहान १० बजेदेखि साँझ ४ बजेसम्म शिविर सञ्चालन गरिएको हो ।
शिविरमा ६५ वर्षभन्दा माथिका एक सयभन्दा बढी ज्येष्ठ नागरिकको स्वास्थ्य जाँच, मनोसामाजिक मनोपरामर्श तथा औषधि वितरण गरिएको आयोजकले जनाएको छ । स्वास्थ्य परीक्षणका क्रममा धेरैजसो ज्येष्ठ नागरिकमा उच्च रक्तचापलगायत दीर्घरोग देखिएको चिकित्सकहरूले जानकारी दिएका छन् ।
शिविरमा डा. संकल्प केसी, डा. अनिल पोखरेललगायत चिकित्सक तथा स्वास्थ्यकर्मीहरूले सेवा प्रदान गरेका थिए । सहभागी ज्येष्ठ नागरिकहरूले घर नजिकै निशुल्क रूपमा स्वास्थ्य सेवा र परामर्श पाउँदा खुशी व्यक्त गरेका थिए ।
पुस्तान्तरण नेपाल ज्येष्ठ नागरिकका लागि आवश्यक स्वास्थ्य, मनोसामाजिक तथा सामाजिक सेवा प्रदान गर्दै आएको संस्था हो । काठमाडौं उपत्यकाबाहिर संस्थाले आयोजना गरेको यो पहिलो स्वास्थ्य शिविर हो । यसअघि संस्थाले वैशाख १३ गते काठमाडौंको बुढानिलकण्ठ नगरपालिका वडा नं. ९ स्थित सुन्दरबस्तीमा शिविर सञ्चालन गरी ६० जना ज्येष्ठ नागरिकलाई सेवा दिएको थियो । त्यसैगरी कीर्तिपुर नगरपालिका वडा नं. ६ चारघरेमा कात्तिक २९ गते आयोजित शिविरमा १०० जना ज्येष्ठ नागरिक लाभान्वित भएका थिए ।
संस्थाले काठमाडौंको शंखपार्क, ललितपुरको युएन पार्क र बुढानिलकण्ठ मन्दिर परिसरमा समेत यस्ता शिविर सम्पन्न गरिसकेको जनाएको छ । पुस्तान्तरण नेपालले ज्येष्ठ नागरिकका लागि यातायात, स्वास्थ्य, मनोरञ्जन तथा दिवा सेवा प्रदान गर्दै आएको छ । भविष्यमा ज्येष्ठ नागरिकको सहज जीवनयापनका लागि ‘ज्येष्ठ नागरिक भिलेज’ स्थापना गर्ने लक्ष्यसमेत संस्थाले लिएको छ ।