उज्यालो नेपाल पार्टीले पहिलो राष्ट्रपति र प्रधानमन्त्री बनाउने दाबी

ईमधेश न्यूज सम्वाददाता,
काठमाडौं, ०६ पौष । 
उज्यालो नेपाल पार्टीले आगामी निर्वाचनपछि दलित समुदायबाटै पहिलो राष्ट्रपति र प्रधानमन्त्री बनाउने दाबी गरेको छ । शनिबार राजधानीको संवाद डबलीमा आयोजित कार्यक्रममा पार्टीका युवा नेता किरण बिकले दलित समुदाय राज्यको शिर्ष नेतृत्वमा नपुगेसम्म वास्तविक न्याय सम्भव नहुने भन्दै यसलाई पार्टीको मुख्य राजनीतिक एजेन्डा बनाइएको जानकारी दिनुभयो ।
बिकले देशभर करिब ७० लाख दलित रहेको उल्लेख गर्दै उज्यालो नेपाल पार्टीले उनीहरूलाई अधिकार सम्पन्न र निर्णायक नेतृत्वमा पु¥याउने स्पष्ट कार्यदिशा लिएको बताउनुभयो । “पुराना दलहरूले दलितलाई सत्तामा पुग्ने भर्याङ र भोट बैंकको रूपमा मात्र प्रयोग गरे,” उहाँले भन्नुभयो, “तर उज्यालो नेपाल पार्टीले दलित समुदायलाई नेतृत्वको केन्द्रमा पु¥याउँछ ।”
उहाँले जेन्जी आन्दोलनका क्रममा भएका दलित सहिद तथा घाइतेहरूको उच्च सम्मान गरिने र उनीहरूको स्मृतिमा विशेष कार्यक्रम ल्याइने प्रतिबद्धता जनाउनुभयो । उज्यालो नेपाल पार्टीले अवलम्बन गरेको सामुदायिक समाजवाद दलितको हक–हित संरक्षण, सामाजिक न्याय स्थापना र विभेद अन्त्य गर्ने प्रभावकारी राजनीतिक दर्शन भएको बिकको भनाइ थियो ।
एमाले, कांग्रेस र माओवादीजस्ता पुराना दलहरूले दलितलाई वास्तविक राजनीतिक अवसर नदिएको आरोप लगाउँदै उनले सुशासनलाई आधार बनाएर निजामती सेवा, प्रहरी, न्यायालय, पुरस्कार प्रणाली तथा गैरसरकारी संस्थामा दलितको सहभागिता सुनिश्चित गरिने बताए । “दलितलाई गरिब बनाएर देश समृद्ध हुन सक्दैन,” उनले भने, “सुरुदेखि नै दलित समुदायमा लगानी गरे देश आफैँ धनी हुन्छ ।”
आगामी फागुन २१ गते हुने निर्वाचनमा करिब ७० लाख दलित उज्यालो नेपाल पार्टीको पक्षमा उभिने विश्वास व्यक्त गर्दै उनले पार्टीको चुनाव चिन्ह ‘बलिरहेको चिम’मा मतदान गर्न आग्रह गर्नुभयो ।