सरकार–निजी क्षेत्र सहकार्य अपरिहार्यः उपराष्ट्रपति यादव

लिलाकान्त यादव,
ललितपुर, ०३ पौष ।
 उपराष्ट्रपति रामसहाय प्रसाद यादवले मुलुकको आर्थिक पुनरुत्थानका लागि सरकार र निजी क्षेत्रबीच विश्वास र सहकार्य अपरिहार्य रहेको बताउनुभएको छ। गोरखापत्र संस्थानद्वारा पुल्चोकमा आयोजित ‘दृढतासहित पुनरुत्थानः गोरखापत्र विमर्श’ कार्यक्रम उद्घाटन गर्दै उहाँले कृषि, जलस्रोत, पर्यटन र पूर्वाधारमा लगानी बढे रोजगारी सिर्जना, आय वृद्धि र उत्पादन विस्तार सम्भव हुने उल्लेख गर्नुभयो।
उपराष्ट्रपति यादवले ‘जेनजी’ आन्दोलनपछि पारदर्शिता, सुशासन, भ्रष्टाचारमुक्त समाज र रोजगारी सुनिश्चित गर्ने दिशामा ठोस आर्थिक बहस आवश्यक रहेको बताए। बैंक तथा वित्तीय संस्थामा थुप्रिएको पुँजी उत्पादनशील क्षेत्रमा परिचालन गर्न सरकार र निजी क्षेत्र काँधमा काँध मिलाएर अघि बढ्नुपर्ने उहाँको भनाइ छ।
गोरखापत्र संस्थानको ऐतिहासिक योगदानको प्रशंसा गर्दै उहाँले ४६ भाषामा सामग्री प्रकाशनमार्फत समावेशी समाज र राष्ट्रिय एकता सुदृढ बनाएको उल्लेख गर्नुभयो। डिजिटल युगमा पत्रकारिताले तथ्यपरकता, विश्वसनीयता र अभिलेखीकरणीय अभ्यासलाई प्राथमिकता दिनुपर्नेमा जोड दिँदै, पूर्वाधार विकासमा पारदर्शिता र उत्तरदायित्व सुनिश्चित गर्न पत्रकारिताको निगरानी भूमिकालाई महत्वपूर्ण बताउनुभयो।
गोरखापत्र दैनिक १२५ औँ र ‘दी राइजिङ नेपाल’ ६१ औँ वर्षमा प्रवेश गरेको अवसरमा उहाँले संस्थानलाई बधाई दिँदै, यस विमर्शले मुलुकको अर्थतन्त्रमा सकारात्मक निचोड दिने विश्वास व्यक्त गर्नुभयो।