रामुपाको धनुषा–३ क्षेत्रीय संयोजकमा दीपक झा सर्वसम्मत चयन

ईमधेश न्यूज सम्वाददाता,
जनकपुरधाम, ०४ पौष ।
 राजेन्द्र महतो नेतृत्वको राष्ट्रिय मुक्ति पार्टी (रामुपा) नेपालले धनुषा निर्वाचन क्षेत्र नं. ३ का लागि दीपक झालाई क्षेत्रीय संयोजकमा सर्वसम्मत रूपमा चयन गरेको छ। पार्टीको क्षेत्रीय बैठकबाट संगठन सुदृढीकरण र क्षेत्रीय राजनीतिक गतिविधिलाई प्रभावकारी बनाउने उद्देश्यसहित झालाई संयोजकको जिम्मेवारी दिइएको हो।
केन्द्रीय उपाध्यक्ष तथा धनुषा–३ का सम्भावित प्रतिनिधिसभा सदस्य उम्मेदवार डा. राजीव झाले नयाँ नेतृत्व चयनसँगै क्षेत्रभित्र संगठन विस्तार, जनसम्पर्क अभियान र राजनीतिक सक्रियता थप तीव्र हुने विश्वास व्यक्त गरे। उनका अनुसार पार्टीले स्थानीय तहसम्म संगठन मजबुत बनाउँदै जनतासँग प्रत्यक्ष संवाद बढाउने रणनीति लिएको छ।
नवनिर्वाचित क्षेत्रीय संयोजक दीपक झाले आफूलाई दिइएको जिम्मेवारीप्रति आभार व्यक्त गर्दै पार्टीको नीति, सिद्धान्त र कार्यक्रम जनतामाझ पु¥याउन प्रतिबद्ध भएर काम गर्ने बताए। उनले क्षेत्रका नेता, कार्यकर्ता र समर्थकलाई एकताबद्ध गर्दै पार्टीलाई अझ मजबुत बनाउने आफ्नो प्राथमिकता रहने उल्लेख गरे।
सो अवसरमा पार्टीका केन्द्रीय सचिव संजय चौधरी, अनुशासन विभाग प्रमुख संजय सिंह, राजनीतिक समिति सदस्य दीपक यादव, जिल्ला उपाध्यक्षहरू विनोद ठाकुर, जितेन्द्र पासवान र शंकर पासवान, जिल्ला सचिव कृष्ण कुमार साह र जीवन यादव, नगराइन नगरपालिका नगर संयोजक राम जीवन साह तथा संजीव झा लगायतका नेता–कार्यकर्ताको उपस्थिति रहेको थियो।