रिले अनशनमा पूर्वमन्त्रीसहित जनप्रतिनिधि एवम् नेताहरू सहभागी

लिलाकान्त यादव,
राजविराज, ०१ पौष ।
 राजविराजस्थित करदाता सेवा कार्यालयलाई आन्तरिक राजस्व कार्यालयमा गाभ्ने सरकारी निर्णयविरुद्ध आन्तरिक राजस्व कार्यालय स्थापना सङ्घर्ष समिति, सप्तरीको आह्वानमा मङ्गलबार पनि रिले अनशन जारी रहेको छ। गजेन्द्र चोकमा जारी अनशनमा पूर्वमन्त्री, जनप्रतिनिधि तथा विभिन्न राजनीतिक दलका नेताहरूको उल्लेखनीय सहभागिता रहेको छ।
नेपाली कम्युनिष्ट पार्टीका नेता तथा पूर्व सिँचाइ मन्त्री उमेश कुमार यादवको अगुवाइमा प्रतिनिधिसभाका निवर्तमान सदस्य रञ्जु ठाकुर, संविधानसभा सदस्य असर्फी सदा, स्वराज अभियानी सुरेन्द्र नारायण यादव, शम्भुनाथ नगरपालिकाकी कार्यवाहक मेयर अनिता चौधरी, छिन्नमस्ता गाउँपालिकाकी उपाध्यक्ष राजु देवी यादव, तिलाठी कोइलाडी गाउँपालिकाकी उपाध्यक्ष फूल कुमारी साह र महदेवा गाउँपालिकाकी उपाध्यक्ष अर्चना यादव रिले अनशनमा सहभागी भएका छन्।
यसैगरी विभिन्न वडाका अध्यक्ष, निवर्तमान जनप्रतिनिधि, राजनीतिक दलका नेता तथा सामाजिक अभियन्ताहरूले पनि ऐक्यबद्धता जनाउँदै २४ घण्टे रिले अनशनमा सहभागिता जनाएका छन्। सङ्घर्ष समितिका संयोजक मोहन यादवका अनुसार सरकारलाई दबाब दिन स्थानीय तहका जनप्रतिनिधि र नेताहरू सामूहिक रूपमा आन्दोलनमा उत्रिएका हुन्।
राजविराजस्थित करदाता सेवा कार्यालयमा ७२ हजारभन्दा बढी करदाता आबद्ध छन् भने गत आर्थिक वर्षमा एक अर्ब रुपैयाँभन्दा बढी राजस्व संकलन भएको थियो। सरकारले देशभरका ३७ करदाता सेवा कार्यालय खारेज गर्ने नीति अघि बढाएपछि यसको विरोधमा आन्दोलन चर्किएको हो।