ललितपुरमा लैङ्गिक हिंसा विरुद्ध डिजिटल सचेतना कार्यक्रम सम्पन्न

ईमधेश न्यूज सम्वाददाता,
ललितपुरं, २४ मंसिर ।
 ‘प्रविधिको सही प्रयोगः लैङ्गिक हिंसा अन्त्य गरौं’ भन्ने मूल नारासहित लैङ्गिक हिंसाविरुद्धको १६ दिने अभियान (नोभेम्बर २५–डिसेम्बर १०) अन्तर्गत विशेष डिजिटल सचेतना कार्यक्रम सम्पन्न भएको छ। शान्ति शिक्षा अभियान नेपाल र किन इन्डिया दिल्लीको संयुक्त आयोजनामा महालक्ष्मी नगरपालिका–६ स्थित सिद्धि मंगल मा.वि., गोदावरी नगरपालिका–५ को लेले गणेश महिला समूह र विभिन्न विद्यालयका विद्यार्थी तथा महिला समूहको सहभागितामा कार्यक्रम सम्पन्न गरिएको हो।
कार्यक्रममा प्रहरी प्रधान कार्यालय, साइबर ब्यूरोकी प्र.स.नि. प्रकृति खड्काले डिजिटल युगमा बढ्दै गएको साइबर हिंसा, त्यसका प्रकार तथा बच्ने उपायहरूबारे विस्तृत जानकारी दिईन्। उनले सामाजिक सञ्जाल तथा अनलाइन प्लेटफर्ममार्फत हुने दुरुपयोगले महिलामाथि विभिन्न किसिमका हिंसा बढिरहेको बताउँदै सुरक्षित प्रयोगका उपायहरू अपनाउन आग्रह गरिन्।
सचेतना कार्यक्रमको संयोजन विश्वकीर्तिमानी सगरमाथा आरोही तथा बालविवाह रोकथाम र मानव बेचविखन विरुद्धका अभियन्ता कल्पना महर्जनले गरेकी थिइन्। उनले सामाजिक सञ्जालमार्फत बालविवाह र मानव बेचविखनजस्ता अपराधले समेत प्रश्रय पाउँदै आएको उल्लेख गर्दै यस प्रकारका कार्यक्रम ग्रामीण तथा शहरी दुवै क्षेत्रमा अत्यन्त आवश्यक रहेको बताइन्।
कार्यक्रम सहभागीहरूले डिजिटल हिंसा रोकथाम तथा सुरक्षित अनलाइन व्यवहारबारे उपयोगी जानकारी पाएको बताएका छन्।