मोरङमा ‘मर्यादित महिनावारी’ सम्बन्धी अन्तरक्रियात्मक प्रशिक्षण सम्पन्न

ईमधेश न्यूज सम्वाददाता,
मोरङ्ग, २२ मंसिर ।
अनौपचारिक क्षेत्र सेवा केन्द्र (इन्सेक) कोशी प्रदेश कार्यालय, विराटनगर र बुढीगंगा गाउँपालिकाको संयुक्त आयोजनामा बुढीगंगा–६ मा ‘मर्यादा, समानता–मानव अधिकारका लागि मर्यादित महिनावारी’ नारासहित अन्तरक्रियात्मक प्रशिक्षण कार्यक्रम सम्पन्न भएको छ। सातौँ अन्तर्राष्ट्रिय मर्यादित महिनावारी दिवसका अवसरमा आयोजित कार्यक्रममा महिनावारीलाई मानव अधिकारका रूपमा स्वीकार गर्दै सबै प्रकारका भेदभाव अन्त्य गर्नुपर्ने संदेश दिइयो।
कार्यक्रममा महिला अधिकार, किशोरी शिक्षा तथा अन्तरपुस्तागत न्यायका विषयमा प्रशिक्षण प्रदान गरिएको थियो। इन्सेक कोशी प्रदेश संयोजक मनोहर पोखरेल र मानव अधिकार रक्षक सञ्जालका संयोजक देबी बाँस्कोटाले सहजीकरण गरेका थिए।
पोखरेलले महिनावारी प्राकृतिक र वैज्ञानिक प्रक्रिया भएकाले यसलाई सम्मानपूर्वक बुझ्न र सुरक्षित ढङ्गले व्यवस्थापन गर्नुपर्नेमा जोड दिए। उनले महिनावारीलाई आधार बनाइ हुने विभेद मानव अधिकारविपरीत रहेको उल्लेख गरे।
देबी बाँस्कोटाले बालविवाह, दाईजो, बहुविवाह, जातीय विभेद, भ्रुण हत्या लगायतका लैङ्गिक हिंसाले समाजको प्रगतिलाई अवरुद्ध पारेको भन्दै सुरक्षित र सचेत समाज निर्माणमा सबैजना जिम्मेवार बन्न आग्रह गरिन्।
कार्यक्रम उद्घाटन गर्दै बुढीगंगा गाउँपालिकाकी उपाध्यक्ष अमृता कुमारी गच्छेदारले हिंसा न्यूनीकरणका लागि गाउँपालिकाले सञ्चालन गरिरहेका विभिन्न कार्यक्रमबारे जानकारी दिँदै महिलाहरूलाई हिंसा विरुद्ध खुला रूपमा आवाज उठाउन प्रेरित गरिन्।
महिला तथा बालबालिका शाखाका प्रमुख निश्चलता कार्कीको सञ्चालनमा सम्पन्न कार्यक्रममा विभिन्न शाखाका प्रतिनिधि, आमा समूह तथा स्थानीय किशोरीहरूको सक्रिय सहभागिता रहेको थियो।