मधेश प्रदेशका नवनियुक्त तीन मन्त्रीले लिए शपथ

ईमधेश न्यूज सम्वाददाता,
जनकपुरधाम, २१ मंसिर ।
 मधेश प्रदेश सरकारका तीनजना नवनियुक्त मन्त्रीले आइतबार पद तथा गोपनीयताको शपथ ग्रहण गरेका छन्। प्रदेश प्रमुख सुरेन्द्र लाभ कर्णले उनीहरूलाई शपथ खुवाएका हुन्।
शपथ लिनेहरूमा नेपाली कांग्रेसका जंगीलाल राय यादव, नेकपा एकीकृत समाजवादीका कनिश पटेल र जनमत पार्टीका महेश प्रसाद यादव रहेका छन्। राय यादव र पटेलले बिना विभागीय मन्त्रीका रूपमा शपथ लिएका हुन् भने जनमत पार्टीका संसदीय दलका नेता महेश यादवले अर्थमन्त्रीको जिम्मेवारी पाएका छन्।
यसअघि नवनियुक्त मुख्यमन्त्री कृष्णप्रसाद यादवले पद तथा गोपनीयताको शपथ ग्रहण गरेका थिए। कांग्रेस संसदीय दलका नेता यादव मंसिर १९ गते सात दलका ७७ प्रदेशसभा सदस्यको समर्थनमा मुख्यमन्त्री नियुक्त भएका हुन्। उनलाई कांग्रेस, जसपा नेपाल, जनमत, लोसपा, तत्कालीन माओवादी केन्द्र र एकीकृत समाजवादीका सांसदहरूले समर्थन गरेका थिए।
मुख्यमन्त्री यादवले मंसिर २४ गते विश्वासको मत लिने तयारी गरिरहेका छन्। सरकारले बाँकी मन्त्रालयको टुंगो विश्वासको मतपछि गर्ने बताइएको छ।