मधेशका नवनियुक्त मुख्यमन्त्री कृष्णप्रसाद यादवले गरे शपथ ग्रहण

ईमधेश न्यूज सम्वाददाता,
जनकपुरधाम, २१ मंसिर ।
 मधेश प्रदेशका नवनियुक्त मुख्यमन्त्री कृष्णप्रसाद यादवले शुक्रबार पद तथा गोपनीयताको शपथ ग्रहण गरेका छन्। उनलाई प्रदेश प्रमुख सुरेन्द्र लाभ कर्णले पद तथा गोपनीयताको शपथ खुवाएका हुन्। मुख्यमन्त्री यादवले यही मंसिर २४ गते प्रदेशसभाबाट विश्वासको मत लिने तयारी गरेका छन्।
कांग्रेस संसदीय दलका नेता यादव मंसिर १९ गते सात दलका ७७ प्रदेशसभा सदस्यको समर्थनमा मुख्यमन्त्री नियुक्त भएका थिए। उनलाई नेपाली कांग्रेस, जसपा नेपाल, जनमत, तत्कालीन माओवादी केन्द्र, लोसपा र तत्कालीन एकीकृत समाजवादीका सांसदहरूले समर्थन जनाएका थिए।
यसअघिका मुख्यमन्त्री एवं एमाले संसदीय दलका नेता सरोज कुमार यादवले मंसिर १७ गते पदबाट राजीनामा दिएपछि मधेश सरकारको नेतृत्व कांग्रेसले पाएको हो। सरोज यादव संविधानको धारा १६८(३) बमोजिम ठूलो दलको हैसियतले मुख्यमन्त्री नियुक्त भएका थिए, तर सातदलीय गठबन्धनले त्यसविरुद्ध सर्वोच्च अदालतमा रिट दायर गरेको थियो। अदालतले २४ घण्टाभित्र विश्वासको मत लिन आदेश दिएपछि सरोज यादवले राजीनामा दिएका थिए।
नवनियुक्त मुख्यमन्त्री कृष्णप्रसाद यादवले आजै सानो आकारको मन्त्रिपरिषद् गठन गर्ने तयारीसमेत गरेका छन्।