माङमालुङ चिया बगानमा करोडौँको हिनामिनाको आरोप, पीडित शेयरधनी अदालत जाने तयारी

ईमधेश न्यूज सम्वाददाता,
काठमाडौं, २० मंसिर ।
 माङमालुङ चिया बगानमा सञ्चालकहरूद्वारा करोडौँ रुपियाँ हिनामिना गरिएको आरोप सार्वजनिक भएपछि पीडित शेयरधनीहरूले न्यायका लागि अदालत जाने तयारी गरेका छन्। राजधानीमा आयोजित पत्रकार सम्मेलनमा बगानका अध्यक्ष किरण राई, कार्यकारी निर्देशक केदार लामिछाने लगायतले दीर्घकालीन योजना बनाएर बगानको सम्पत्ति व्यक्तिगत फाइदाका लागि दुरुपयोग गरेको आरोप लगाइयो।
उपत्यका संयोजक हिमाल राईले ८० रोपनी बगानजग्गा अन्य शेयरधनीलाई नजानकारी दिई गैरकानुनी रूपमा बिक्री गरिएको दाबी गरे। शेयरधनी आङकाजी शेर्पा र गोम्बा शेर्पाले ‘माई होम माई गार्डेन’ नाममा सर्वसाधारणबाट उठाइएको ठूलो रकमको दर्ता–लगतसमेत नराखिएको बताए।
संस्थापक शेयरधनी बुद्धिबहादुर राई नेतृत्वको छानविन समितिले तयारी गरेको प्रतिवेदनमा आर्थिक वर्ष २०७२÷७३ देखि २०७८÷७९ सम्म करिब ९ करोड २१ लाख रुपैयाँको लेखापरीक्षण अपारदर्शी रहेको उल्लेख छ। अन्य शेयरधनीहरूले समेत हालसम्म १५ करोड रुपैयाँभन्दा बढी रकम नीतिगत रूपमा दुरुपयोग भएको आरोप लगाए।
बिल–भर्पाई विना भुक्तानी, व्यक्तिगत ऋण कारोबारमा प्रक्रिया नअपनाउने, मजदुर ज्यालामा मनपरी भुक्तानी, लेखा समितिको सुझाव उपेक्षा लगायतका अनियमितता उजागर भएको छ। उनीहरूले कम्पनी बचाउन तथा दोषीलाई कानुनी कारवाहीको दायरामा ल्याउन अदालतिको ढोका ढकढकाउन बाध्य भएको बताएका छन्।