विदेशमा रहेका नेपालीका लागि मतदान सुनिश्चित गर्न सनपाको जोड

ईमधेश न्यूज सम्वाददाता,
काठमाडौं, १८ मंसिर ।
 संयुक्त नागरिक पार्टी (सनपा)ले विदेशमा रहेका नेपाली नागरिकलाई मतदानको व्यवस्था तत्काल सुनिश्चित गर्न सरकार र राजनीतिक दलसमक्ष माग गरेको छ। राजधानीको संवाद डबलीमा बिहिबार आयोजित पत्रकार सम्मेलनमार्फत पार्टीले निर्वाचन तोकिएको समयमा नहुँदा देश नै दुर्घटनामा पर्ने चेतावनी दियो।
कार्यक्रममा पार्टी अध्यक्ष दलमर्दन कामीले जेनजी विद्रोहबाट बनेको वर्तमान सरकार जनताप्रति उत्तरदायी हुनुपर्ने र निर्धारित समयसीमाभित्रै चुनाव सम्पन्न गर्नुपर्नेमा जोड दिए। दमनकारी तथा घुसपैठी तत्वहरू सक्रिय बन्दै गएको उल्लेख गर्दै उनले ती सबैलाई कानुनी दायरामा ल्याउन माग गरे। गितार चिन्ह लिएर चुनावी प्रतिस्पर्धामा उत्रिएको जानकारी दिँदै अध्यक्ष कामीले मतदातालाई गितारमा विश्वासको मत दिन अपिलसमेत गरे।
उपाध्यक्ष डा. शिवहरि भट्टराईले पछिल्ला दिनमा दल तथा नेताहरू लोकप्रियता कमाउने नाममा समाजमा उत्तेजना पैदा गर्ने गतिविधि बढेको भन्दै चिन्ता व्यक्त गरे।
महासचिव डा. तेजबहादुर रोक्काले विदेशमा रहेका लाखौँ नेपालीको मताधिकार निरन्तर उपेक्षा हुँदै आएको आरोप लगाए। “एक पटकको नेपाली सधैंका लागि नेपाली” भन्ने मन्तव्य राख्दै उनले विदेशबाटै मतदान गर्ने व्यवस्था तत्काल लागू गर्नुपर्ने माग दोहो¥याए।
सह–महासचिव तथा प्रवक्ता विदुर अधिकारीले जेनजी पुस्ताको बलिदान स्मरण गर्दै सबै अग्रगामी शक्ति एकताबद्ध भएर चुनावी मैदानमा उत्रिनुपर्नेमा जोड दिए। उनले पुरानादलले जरा गाडेको कुशासनलाई परास्त गर्न नयाँ पुस्ता र नयाँ राजनीतिक शक्तिहरू एकीकृत अभियानमा उभिनुपर्ने तर्क गरे।