कञ्चनरुप–५ मा जंगली हात्तीको आक्रमणः किसान नारायण खंगको मृत्यु

लिलाकान्त यादव,
राजविराज, १८ मंसिर ।
 कञ्चनरुप–५का ५५ वर्षीय किसान नारायण खंगको जंगली हात्तीको आक्रमणबाट दुःखद मृत्यु भएको छ। धानबाली जोगाउन खेतमै सुतिरहेका खंगमाथि गएराति हात्तीको झुण्ड अचानक आक्रमणपछि कुल्चिएर घटनास्थलमै ज्यान गएको स्थानीयले बताए।
स्थानीयवासीका अनुसार पछिल्ला दिनमा जंगली हात्तीको आवाजाही तीव्र बन्दै गएको हो। गर्मी–चाडपर्वको समय नजिकिँदै गर्दा हात्ती खेतबारीमा पसेर बाली नष्ट गर्ने क्रम बढेपछि किसानहरू रातभरि सतर्क रहँदै आएका थिए। सोही क्रममा खेतमै सुतिरहेका खंगमाथि हात्ती दौडिँदै आएको र बच्न नपाएको बताइन्छ।
गत पाँच वर्षयता कञ्चनरुप क्षेत्रमा बाली संरक्षणकै क्रममा एक दर्जनभन्दा बढी किसानले ज्यान गुमाइसकेका छन्। हात्ती आतङ्क रोकथाम र प्रभावित किसानको सुरक्षाका लागि स्थानीय बासिन्दाले बारम्बार माग गर्दै आए पनि प्रभावकारी कदम भने देखिएको छैन।
जंगली हात्तीको बढ्दो जोखिमले किसानको ज्यान तथा जीविकामै संकट आएकाले स्थानीयवासीले सम्बन्धित निकाय—वन डिभिजन, स्थानीय तह र सुरक्षा निकाय—बीच समन्वय गरी तत्काल ठोस तथा दीर्घकालीन समाधान ल्याउन आग्रह गरेका छन्।