मधेश प्रदेशमा नयाँ मुख्यमन्त्री नियुक्ति प्रक्रियाको लागि दाबी आह्वान

प्रदेश–२, जनकपुरधाम – मधेश प्रदेशका मुख्यमन्त्री सरोज कुमार यादवले पदबाट राजीनामा दिएपछि प्रदेशमा नयाँ सरकार गठनको प्रक्रिया औपचारिक रूपमा सुरु भएको छ। मुख्यमन्त्री यादवले नेपालको संविधानको धारा १६९ उपधारा (१) को खण्ड (क) बमोजिम मधेश प्रदेश प्रमुख सुरेन्द्र लाभ कर्णसमक्ष राजीनामा बुझाउनु भएको थियो। सो राजीनामा मधेश प्रदेश प्रमुखले मिति २०८२ मंसिर १७ गते स्वीकृत गरेका छन्। राजीनामा स्वीकार भएपछि संविधानको धारा १६८(२) अनुसार नयाँ मुख्यमन्त्री चयनका लागि प्रक्रिया अघि बढाइएको छ। प्रदेश प्रमुख कार्यालयले जारी गरेको विज्ञप्तिअनुसार प्रदेश सभामा प्रतिनिधित्व गर्ने दुई वा दुईभन्दा बढी दलहरूको समर्थनमा बहुमत प्राप्त गर्न सक्ने कुनै पनि प्रदेश सभा सदस्यले आफ्नो दाबी पेश गर्न सक्ने व्यवस्था गरिएको छ। यसका लागि इच्छुक सदस्यहरूले मंसिर १९ गते, शुक्रवार, साँझ ५ बजेभित्र दाबी पेश गर्नुपर्ने प्रदेश प्रमुख कार्यालयले जनाएको छ। मधेश प्रदेशमा हाल सत्ता समीकरण परिवर्तनसँगै नयाँ गठबन्धन गठन हुने चर्चा चर्किएको छ। दाबी प्रस्तुत गर्ने समयसीमा नकट्दै राजनीतिक दलहरूबीच छलफल तीव्र भइरहेको जनाइएको छ। नयाँ मुख्यमन्त्री चयनसँगै प्रदेशको राजनीतिक दिशाबारे स्पष्टता आउने अपेक्षा गरिएको छ।