विपक्षीविहीन सभामा मुख्यमन्त्री यादवले विश्वासको मत मागे

ईमधेश न्यूज सम्वाददाता,
जनकपुरधाम, १७ मंसिर ।
 विश्वासको मत लिने कार्यसूचीअनुसार बुधबार बिहान बसेको प्रदेशसभाको बैठकमा अनुपस्थित भएका मुख्यमन्त्री सरोजकुमार यादव पुनः उपस्थित भएपछि स्थगित बैठक पुनः सुरु भएको छ। बैठक सञ्चालन गरिरहेकी उपसभामुख बबिता राउत ईसरले मुख्यमन्त्री यादवलाई विश्वासको मत प्राप्त गर्न प्रस्ताव पेस गर्न अनुमति दिइन।
प्रस्ताव पेस गर्दै मुख्यमन्त्री यादवले प्रदेशको स्थिरता र सुशासनका लागि आफ्नो पक्षमा मत दिन सभासदहरूलाई आग्रह गरे। तर विश्वासको मत प्रक्रियामा विपक्षी सात दल भने सहभागी भएनन्। विपक्षी बेन्च पूरै खाली रहँदा बैठकमा एमालेका सांसद मात्र उपस्थित थिए। राप्रपाबाट मन्त्री बनेकी कञ्चन बिच्छा र नेपाल संघीय समाजवादी पार्टीकी मन्त्री विमला अन्सारी पनि बैठकमा सहभागी भए।
यसअघि बिहान ८ः३० बजे बसेको बैठकमा मुख्यमन्त्री उपस्थित नहुँदा उपसभामुखले बैठक स्थगित गरेकी थिइन्। सर्वोच्च अदालतको परमादेशअनुसार २४ घण्टाभित्र विश्वासको मत लिन निर्देशन दिइए पनि आफूले पत्र ढिलो प्राप्त गरेको हुनाले बैठक दिउँसो २ बजे बोलाउन सचिवालयलाई आग्रह गरेको मुख्यमन्त्री यादवले बताएका थिए। तर सचिवालयले बिहान साढे ८ बजे नै बैठक बोलाएको थियो।