मधेश प्रदेशसभा बैठकमा मुख्यमन्त्रीको विश्वासको मतबारे प्रस्ताव पेस

ईमधेश न्यूज सम्वाददाता,
जनकपुरधाम, १७ मंसिर ।
 मधेश प्रदेश सभाको छैटौँ अधिवेशन, आठौँ बैठकले प्रदेशका मुख्यमन्त्री सरोजकुमार यादवले विश्वासको मत लिनुपर्ने सम्बन्धमा पेस भएको प्रस्ताव अघि बढाउने निर्णय गरेको छ । बुधवार बिहान ८ः३० बजे बसेको बैठकमा नेपालको संविधानको धारा १६८(४) अनुसार मुख्यमन्त्रीलाई सभाबाट विश्वासको मत प्राप्त गर्ने व्यवस्था उल्लेख गरिएको छ।
प्रदेशसभा सचिवालयका अनुसार प्रदेश सभा सदस्य (कार्य सञ्चालन) नियमावली, २०७९ को नियम १२४ को उपनियम (२) बमोजिम विश्वासको मत सम्बन्धी प्रस्ताव सभामा प्रस्तुत गरिएको हो। बैठकमा प्रस्तावलाई कार्यसूचीमा समावेश गरी आवश्यक प्रक्रिया अघि बढाइने सचिव बासु प्रसाद कोइराला द्वारा जारी विज्ञप्तिमा उल्लेख छ।
यसअघि आएको राजनीतिक परिस्थितिसँगै मुख्यमन्त्री यादवले विश्वासको मत लिनुपर्ने अवस्था बनेको हो। प्रदेशसभाको आगामी बैठकमा विश्वासको मतका लागि छलफल र मतदान प्रक्रिया अघि बढाइने अपेक्षा गरिएको छ।