सप्तरीमा श्रीमानको खुकुरी प्रहारबाट श्रीमती गम्भीर घाइते

लिलाकान्त यादव,
राजविराज, १३ मंसिर ।
सप्तरीको कञ्चनरुप नगरपालिका–१२ मा शनिबार भएको घरेलु हिंसाको घटनामा एक महिला श्रीमानकै खुकुरी प्रहारबाट घाइते भएकी छन्। वडा नम्बर १२ का ३५ वर्षीय कपिल सदाले तीब्र विवादको क्रममा ३० वर्षीया श्रीमती रुबिना देवी सदामाथि खुकुरी प्रहार गरेको इलाका प्रहरी कार्यालय कञ्चनपुरले जनाएको छ।
प्रहारका कारण रुबिनाको टाउकोमा गम्भीर चोट लागेर पाँच वटा टाँका लगाइएको छ। हाल उनको स्थानीय स्वास्थ्य संस्थामा उपचार भइरहेको तथा अवस्था नियन्त्रणमा रहेको प्रहरीले जनाएको छ। घटना हुँदा कपिल सदा मादक पदार्थ सेवन गरेको प्रारम्भिक अनुसन्धानबाट खुलेको छ।
घटना पश्चात आरोपी कपिल सदालाई प्रहरीले तत्काल नियन्त्रणमा लिई थप अनुसन्धान अघि बढाएको छ। प्रहरीले यसलाई गम्भीर घरेलु हिंसा मान्दै कानूनी कारबाहीका लागि आवश्यक प्रक्रिया सुरू गरेको बताएको छ।
स्थानीयवासीका अनुसार दम्पतीबीच पहिले पनि विवाद हुँदै आएको बताए पनि यसपटक घटना हिंसात्मक रूपमा बढेर गम्भीर घाइतेसम्म पुगेको हो। प्रहरीले समुदायमा घरेलु हिंसा रोकथाम तथा मादक पदार्थ दुरुपयोगका विषयमा जनचेतना आवश्यक रहेको बताएको छ।