पत्रकार दिपेन्द्र शर्माको ‘युद्ध पत्रकारिता’ पुस्तक सार्वजनिक

काठमाडौं, २०८२ मंसिर १२ – पत्रकार दिपेन्द्र शर्माद्वारा लेखिएको ‘युद्ध पत्रकारिता’ पुस्तक राजधानीको संवाद डबलीमा एक समारोहका बीच सार्वजनिक गरिएको छ। राष्ट्रिय सभाका अध्यक्ष नारायण प्रसाद दाहालले पुस्तक लोकार्पण गर्दै जनयुद्धका क्रममा निर्भीक रूपमा काम गर्ने पत्रकारहरूको भूमिका नेपाली समाज र राजनीतिक परिवर्तनका लागि ऐतिहासिक रहेको उल्लेख गरे। पुस्तकमाथि टिप्पणी गर्दै दाहालले बारुद र मसीको संयोजन नै युद्ध पत्रकारिताको वास्तविकता भएको बताए। “बन्दुक र कलमको समायोजन, लडाइँ र पढाइको फ्युजन, बारुद र मसीको घोलको मिश्रण आजको गणतन्त्र हो,” उनले भने। नेपाल पत्रकार महासंघकी अध्यक्ष निर्मला शर्माले जनयुद्धकालीन पत्रकारिता ‘मिसन पत्रकारिता’को रूपमा परिचित रहेको र अहिले पनि पत्रकारिता पर्दै गएको दबाबबीच मिसन पत्रकारिता निरन्तर जारी रहेको बताइन्। उनले नागरिकले सहज रूपमा सूचना पाउने अधिकार सुनिश्चित गर्न राज्य जिम्मेवार बन्नुपर्नेमा जोड दिइन्। समारोहमा पत्रकार महेश्वर दाहालले माओवादी जनयुद्धका समयदेखि युद्ध पत्रकारिताको अभ्यास व्यवस्थित रूपमा विकास भएको बताउँदै यसको दस्तावेजीकरण आवश्यक रहेको उल्लेख गरे। लेखक शर्माले युद्धकालमा पत्रकारहरूले भोगेका जोखिम, भूमिकाहरू र योगदानलाई इतिहासका लागि अभिलेखीकरण गर्ने लक्ष्यसहित पुस्तक तयार पारेको बताए। ---