पूर्वमन्त्री भगवती चौधरीको पहलमा एक सय सुरक्षित घर हस्तान्तरण

ईमधेश न्यूज सम्वाददाता,
सुनसरी, ११ मंसिर ।
सुनसरी जिल्लाका गढी, बर्जु गाउँपालिका, दुहवी र इनरुवा नगरपालिकाका अति विपन्न र भूमिहीन परिवारका लागि निर्माण गरिएका एक सय सुरक्षित घर मंगलबार औपचारिक रूपमा हस्तान्तरण गरिएको छ । कार्यक्रम गढी गाउँपालिका–२ को कोलर्हवा सामुदायिक ग्राममा आयोजित थियो।
सुनसरी–३ की निवर्तमान सांसद तथा पूर्वमन्त्री भगवती चौधरीको विशेष पहलमा निर्माण भएका तीन कोठे भूकम्प प्रतिरोधी घरहरू विपन्न परिवारलाई हस्तान्तरण गरिएका हुन्। ग्रामीण महिला उत्सुकता विकास मञ्च (फरवार्ड) र बुद्धिष्ट चुजी च्यारिटी फाउन्डेसनको सहयोगमा निर्माण गरिएका घरमा दुई शयनकक्ष, एक भान्सा, शौचालय र खानेपानीका लागि कल जडान गरिएको छ। एक घर निर्माण लागत ६ लाख ५० हजार रहेको छ।
कार्यक्रममा बोल्दै चौधरीले आफ्नो क्षेत्रका दलित, मुसहर, ऋषिदेव जस्ता भूमिहीन नागरिकका दुःख कम गर्ने दीर्घकालीन लक्ष्य अन्तर्गत यो परियोजना पूरा भएको बताइन्। ‘‘वर्षौंदेखि जग्गा–घरविहीन जनताको पीडामा मल्हम लगाउन पाउँदा खुसी लागेको छ,’’ उनले भनिन्।
बुद्धिष्ट चुजी च्यारिटी फाउन्डेसनका उपाध्यक्ष लिन पी यूले विपन्न समुदायको जीवनस्तर परिवर्तनमा निरन्तर सहकार्य गर्ने प्रतिबद्धता जनाइन्। समाज कल्याण परिषद्का उपाध्यक्ष नन्दलाल माझी र स्थानीय जनप्रतिनिधिहरूले परियोजनाले क्षेत्रमा ठूलो राहत पुगेको बताए।
सो अवसरमा लाभार्थी परिवारलाई घरसँगै लत्ताकपडा र खाद्यान्नसमेत वितरण गरिएको थियो। फरवार्ड नेपालका कार्यकारी निर्देशक द्रब्यराज चौधरीका अनुसार आगामी वर्षहरूमा पनि यस्ता सुरक्षित आवास निर्माण जारी रहनेछ।