जसपा नेपाल सप्तरीद्वारा २८ बुँदे मागसहित प्रधानमन्त्रीलाई ज्ञापनपत्र

लिलाकान्त यादव,
राजविराज,१० मंसिर । 
 जनता समाजवादी पार्टी (जसपा) नेपाल सप्तरीले संविधान संशोधनदेखि पहिचानका आधारमा कोशी प्रदेशको नामाङ्कनसम्मका विभिन्न २८ बुँदे मागसहित प्रधानमन्त्री शुशिला कार्कीलाई ज्ञापनपत्र बुझाएको छ। जिल्ला अध्यक्ष केदार प्रसाद यादवको नेतृत्वमा गएको टोलीले प्रमुख जिल्ला अधिकारी टुवराज पोखरेलमार्फत ज्ञापनपत्र हस्तान्तरण गरेको हो।
ज्ञापनपत्रमा मधेस विद्रोहको भावना अनुरूप संविधान संशोधन, जेनजी विद्रोहका एजेन्डालाई सम्बोधन, कोशी प्रदेश खारेजी, पहिचानसम्मत नामकरण, अधिकार प्रत्यायोजन, समानुपातिक प्रतिनिधित्व सुनिश्चितता लगायतका मुद्दा समेटिएका छन्। माग पूरा नभए चरणबद्ध र सशक्त आन्दोलनमा उत्रिने चेतावनी जसपाले दिएको छ।
ज्ञापनपत्र बुझ्दै प्रजिअ पोखरेलले उक्त माग तुरुन्तै प्रधानमन्त्री तथा मन्त्रिपरिषद् कार्यालय पठाइने प्रतिबद्धता व्यक्त गरे। कार्यक्रममा केन्द्रीय, प्रदेश र जिल्ला संरचनाका पदाधिकारी तथा भातृ संगठनका प्रतिनिधिहरूको उल्लेख्य उपस्थिति रहेको थियो।
जसपाले पहिल्यै सार्वजनिक गरेको संघर्ष–कार्यक्रमअनुसार देशभर मंसिर १० गते सबै जिल्लाबाट प्रधानमन्त्रीलाई ज्ञापनपत्र बुझाउने, ११–१५ गतेसम्म प्रत्येक संसदीय क्षेत्रका शहर तथा बजार क्षेत्रमा विरोध, कोणसभा तथा जनपरिचालन गर्ने जनाएको छ। मंसिर १९–२१ गते जिल्लास्तरीय धर्ना तथा मंसिर २७ देखि पुस ४ गतेसम्म देशभर जनसभा आयोजना गरिनेछ।
यस्तै, पुस १२ गते विराटनगर, १४ गते जनकपुर, १५ गते वीरगन्ज र १७ गते नेपालगन्ज÷भैरहवामा प्रदेशस्तरीय जनप्रदर्शन तथा विरोधसभा गर्ने कार्यक्रम सार्वजनिक गरिएको जसपा नेपाल सप्तरीले जनाएको छ।