सुशीला कार्की हटाएर सर्वमान्य नागरिक सरकार बनाउनुपर्ने जन प्रजातान्त्रिक पार्टीको माग

ईमधेश न्यूज सम्वाददाता,
काठमाडौं, १० मंसिर ।
 जन प्रजातान्त्रिक पार्टी नेपालले प्रधानमन्त्री सुशीला कार्कीलाई हटाई सर्वमान्य नागरिक सरकार गठन गर्न माग गरेको छ। बुधबार राजधानीमा आयोजित पत्रकार सम्मेलनमार्फत पार्टीले जेन–जी आन्दोलनलाई सम्बोधन गर्नुको साटो सरकार उल्टै धरपकडमा उत्रिएपछि जनतामा गम्भीर अविश्वास पैदा भएको जनाएको हो।
पार्टी अध्यक्ष निरबहादुर श्रेष्ठले जेन–जीमाथिको दमनले सरकारप्रति आक्रोश बढेको आरोप लगाए। उनले सुशासन र भ्रष्टाचारमुक्त देशको जनआकांक्षालाई सरकारले बेवास्ता गरेको दाबी गर्दै “जेन–जीलाई साथ दिएर भ्रष्टाचार अन्त्य गर्छु भन्ने सुशीला कार्की बारबारा फाउण्डेसनको प्रतिनिधि जस्तै भएर काम गरिन्, अब उहाँलाई हटाउनुको विकल्प छैन,” भने।
उपाध्यक्ष मेनुका श्रेष्ठले जेन–जी विद्रोहका क्रममा पनि कलिला युवाहरूले ज्यान गुमाएको स्मरण गर्दै उनीहरूको सपना जोगाउन पार्टी संघर्षमा अग्रसर हुने बताइन्। महासचिव राजेन्द्र नेगीले १६ वर्षमै नागरिकता दिएर मतदान अधिकार नदिनु अन्याय भएको उल्लेख गर्दै अन्तरिम संविधानमार्फत प्रत्यक्ष निर्वाचित कार्यकारी प्रधानमन्त्रीको व्यवस्था गर्न माग गरे।
पार्टीले विदेशी संस्थाहरूको हस्तक्षेपले देश अस्थिर बनाइरहेको आरोपसमेत लगाएको छ। साथै, माग सम्बोधनका लागि अध्यक्ष श्रेष्ठको संयोजकत्वमा पाँच सदस्यीय वार्ता समिति गठन गरिएको जनाएको छ।