रौतहटमा जसपा नेपालप्रति बढ्दो आकर्षण, सयौँ कार्यकर्ता पार्टीमा प्रवेश

ईमधेश न्यूज सम्वाददाता,
रौतहट, ०७ मंसिर ।
 फागुन २१ गते हुने निर्वाचन नजिकिँदै जाँदा जनता समाजवादी पार्टी (जसपा) नेपालमा प्रवेश गर्नेको लहर तीव्र बन्दै गएको छ। यही क्रममा आज दुर्गाभगवती गाउँपालिकामा आयोजित बृहत् पार्टी प्रवेश कार्यक्रममा अध्यक्ष उपेन्द्र यादवलाई स्थानीयवासीले भव्य स्वागत गरेका छन्।
कार्यक्रममा कांग्रेस, एमाले, नेकपा लगायत विभिन्न राजनीतिक दल परित्याग गरी सयौँ नेता तथा कार्यकर्ताले सामूहिक रूपमा जसपा नेपालमा प्रवेश गरेका छन्। नवप्रवेशीहरूलाई अध्यक्ष यादवले खादा–माला लगाई पार्टीमा स्वागत गर्दै उनीहरूको निर्णयलाई “परिवर्तन र समानताको दिशामा अग्रसर कदम” भनेर व्याख्या गरे।
अध्यक्ष यादवले वर्तमान राजनीतिक परिवेशमा मधेशी, जनजाति, महिलादेखि युवा–विद्यार्थीसम्मका मुद्दा सम्बोधनका लागि जसपा नेपाल सक्षम र जिम्मेवार शक्ति भएको उल्लेख गरे। उनले देशलाई स्थिरता, समावेशिता र सामाजिक न्यायतर्फ लैजान पार्टी प्रतिबद्ध रहेको बताउँदै आगामी निर्वाचनले नयाँ राजनीतिक ऊर्जा ल्याउने विश्वास व्यक्त गरे।
कार्यक्रममा सहभागी स्थानीय नेताहरूले प्रदेश र संघीय राजनीतिमा सक्रिय भूमिका खेल्न जसपाको नीतिले विश्वास दिलाएको बताए। जनकपुर–तराई क्षेत्रमा जसपाप्रति बढ्दै गएको जनसमर्थनले आगामी निर्वाचनमा पार्टी मजबुत रूपमा प्रस्तुत हुने अनुमान गरिएको छ।
दुर्गाभगवती गाउँपालिकासहित रौतहट क्षेत्रभरि आजको पार्टी प्रवेश कार्यक्रम उत्साहपूर्ण बनेको आयोजकहरूले बताएका छन्। जसपा नेपालले यस्ता कार्यक्रम आगामी दिनमा अन्य पालिकामा पनि निरन्तर संचालन गर्ने जनाइएको छ।